अमेरिका–उत्तर कोरिया सम्बन्धय् समस्या

प्योंगयोंग – उत्तर कोरिया व अमेरिका सम्बन्धय् हाकनं समस्या खने दया वःगु दु । उत्तर कोरियाली सरकारी संचारमाध्यमं अमेरिकां थःगु देय्या विरुद्ध युद्ध यायेगु ल्याखं आपराधिक षडयन्त्र यानाच्वंगु द्वपं बिउगु दु । उत्तर कोरियाली सरकारी संचारमाध्यमं अमेरिकां छखे थःपिंनापं मित्रताया ल्हाः न्ह्यःने हयाः न्हिलाः न्हिलाः संवाद यानाच्वंगु दुसा मेखे युद्ध यायेगु सोचं षडयन्त्र यानाच्वंगु धइगु द्वपं बिउगु दु ।

अमेरिकी टेलिभिजन च्यानल सीएनएनया कथं उत्तर कोरियाली समाचार पत्र ‘रोडोंग सिनमुन’य् पिहां वःगु छगू रिपोर्ट लिपा दक्षिण कोरियाली रेडियोय् प्रशारण जुइधुंकाः वःगु खः ।रिपोर्टय् उत्तर कोरियाय् आक्रमण यायेगु नियतं अमेरिकी सुरक्षाबलं जापानय् सैन्य अभ्यास यानाच्वंगु दावी यानातःगु दु ।

उत्तर कोरियाली समाचार पत्रं अमेरिकाया थुकुथंया निपाः ख्वाःपाःयात थःपिंसं दुग्यंक अध्ययन यानाच्वनागु नं धाःगु दु । ‘यदि अमेरिकां सुयात नं ‘गनबोट कूटनीति’या माध्यमं ल्यहें थनाः वांछ्वयेफु धइगु विचाः यानाच्वंगु खः धइगु जूसा व वयागु निंतिं तःधंगु गल्ती जुइफु’ रोडोंग सिनमुनया रिपोर्टय् धयातःगु दु ।

उखे युनाइटेड स्टेटस फोर्सेज जापान (युएसएफजें) अमेरिकी समाचार टेलिभिजन च्यानल सीएनएनयात उत्तर व दक्षिण कोरियाली संचारमाध्यमय् गुकथं सैन्य अभ्यास याःगु चर्चा जुयाच्वन उकिया बारे थःपिंत छुं नं कथंया जानकारी मदुगु स्पष्ट याःगु दु ।

युएसएफजेया सार्वजनिक मामिला निर्देशक कर्नल जोन ह्युचसनं आम रुपं थःपिनिगु ग्वाहालिमि व क्षेत्रीय ग्वाहालिमिपिं क्षेत्रीय शान्ति व सुरक्षाया हितय् थःपिनिगु प्रतिवद्धतायात कयाः समर्थन यानाच्वंगु व उकी जापानं न्हियान्हिथं अमेरिकी विमान व जहाज संचालन यायेगु ज्या जुयाच्वंगु खँ धाःगु दु ।