लानिपुखुली ध्यबा मकायेत सुझाव

येँ – लानिपुखू दयेकेगु निंतिं सुझाव बीत गठन जूगु विज्ञतय् पुचलं लानिपुखू मल्लकालीन शैलीं हे दयेकेगु सुझाव येँ मनपायात बिउगु दु । पुरातत्व विभागया पुलांम्ह महानिर्देशक बिष्णुराज कार्कीं येँ मनपाया मेयर विद्यासुन्दर शाक्ययात म्हिगः लल्हाःगु प्रतिवेदनय् उगु सुझाव बियातःगु खः ।

थ्व स्वयां न्ह्यः पुनःनिर्माणया इलय् दयेकूगु कंक्रिटया अंगः नष्ट यानाः पुलांगु हे शैलीं दयेकेमाःगु खँ धासें कार्कीं लानिपुखूया बालगोपालेश्वर देगः नं पुलांगु शैलीं हे दयेकेमाःगु सुझाव थःपिंसं बियागु खँ कनादीगु दु । प्रतिवेदन लःल्हाना कासें मेयर शाक्यं आः पुनःनिर्माण प्राधिकरण, पुरातत्व विभाग व कामपा प्रतिनिधि च्वनाः प्रतिवेदनया अध्ययन लिपा ज्या सुरु यायेगु खँ कनादिल ।

यल दरवार क्षेत्र, हनुमानध्वाखा दरवार क्षेत्र लगातय छुं ऐतिहासिक थासय् ध्यबा कयाः जक दुकायेगु यानाच्वंगु खँ कनादिसें वय्कलं धयादिल, ‘लानिपुखुली दुहां वनेत छुं ध्यबा कायेगु न्हूगु विषय मखु, थुकियात व्यावसायिक धायेगु गलत जुइ ।’ तर विज्ञ पुचलं बिउगु सुझावय् धाःसा लानिपुखू दुने गुगुं नं कथं ध्यबा म्हयेगु उचित मजूगु व व्यावसायिक रुपं विकास याये मजिउगु खँ न्ह्यथनातःगु दु ।
लानिपुखूया दिगो व्यवस्थापनया निंतिं आम्दानीया स्रोत मालेमाःगु सुझाव बियातःगु दुुसां अन दुहां वनेत ध्यबा कायेगु ज्या धाःसा याये मजिउ धयातःगु दु । विज्ञ पुचलं प्रतिवेदन लःल्हाःगु इलय् अन थ्यंपिं सम्पदाप्रेमितय्सं तःक्वः दनेगु हानं थुनेगु ज्यां जनताया ध्यबा सितिं वंगु धासें गलत निर्णय याःपिंत कारबाही यायेमाःगु माग समेत याःगु खः ।

विज्ञ पुचलं आः लानिपुखूया उत्खनन् यायेमाःगु सुझाव नं बियातःगु दु । प्रतिवेदनया अध्ययन लिपा पुखूया उत्खनन् यायेगु जानकारी नं बिउगु दु ।