नागढुंगांनिसें कलंकी तक आकाशे ताँ

येँ – चन्द्रागिरी नगरपालिकां नागढुंगां निसें कलंकी तक आकाशे ताँ दयेकीगु जूगु दु। राजधानी येँय् दुहां वइगु मू नाका जुयाच्वंगु उगु नगरपालिकां चालू आर्थिक दँय् थ्व आकाशे ताँ दयेकेगु निंतिं छगू करोडया बजेट विनियोजन याःगु दु ।

नगरपालिकाया मेयर घनश्याम गिरीं येँ दुहां वयेगु मू नाकाय् च्वंगु चन्द्रागिरीइ लँजुवाःतय्त लँ त्वाल्हायेत समस्या जूगुलिं आकाशे ताँ दयेकेगु योजना हयागु खँ धयादीगु दु। वय्कलं लँ त्वाःल्हायेत आकाशे ताँ मदुगुलिं यानाः आपालं दुर्घटना जुयाच्वंगु धासें आकाशे ताँ दयेकेधुंकाः सवारी दुर्घटना म्हो जुइगु खँ नं धयादीगु दु। राजधानी येँदेय्या ट्राफिक समस्या समाधान यायेगु लागिं चन्द्रागिरी नपाया नं यक्व ग्वाहालि आवश्यक जुइगु खँ विज्ञतय्सं धायेगु याः ।

उकथं हे स्थानीय जनताया सुरक्षायात ध्यानय् तयाः नगरपालिकाया थीथी लागाय् सिसीटिभि जडान यायेगु तयारी जुयाच्वंगु जानकारी नं वय्कलं बियादीगु दु। वय्कःया कथं सिसीटिभी जडान लिपा सतकय् जुइगु आपराधिक घटना म्हसीके फइगु व अपराध नियन्त्रण यायेत ग्वाहालि जुइगु आशा यानातःगु दु ।

थ्व स्वयां न्ह्यः चन्द्रागिरी नगरपालिकां १५ शय्याया नगरस्तरीय अस्पताल सञ्चालनय् हयेधुंकूगु दु। उगु अस्पतालय् वर्थिब सेन्टरया नं सुविधा दुगु खँ धाःगु दु। लिसें स्थानीय जनतायात सुविधायात ध्यानय् तयाः एम्बुलेन्स नं सञ्चालनय् हयेधुंकूगु दु ।

सम्बन्धित बुखँ

LEAVE YOUR COMMENTS