म्हय्पि देगः बचे यायेत रिटेलिङ वाल

येँ – म्हय्पि देगःया संरक्षण यायेगु ज्या शुरु जूगु दु । देगः संरक्षणया निंतिं थौंकन्हय् देगःया छचाःखेरं रिटेलिङ वाल दयेकेगु ज्या जुयाच्वंगु दु । प्रदेश नं. ३या सांसद वसन्त मानन्धरया सांसद विकास कोषपाखें ५० गू लाख तका खर्चय् थौंकन्हय म्हय्पि देगःया छचाःखेरं भूक्षय जुइगुयात पनेगु निंतिं रिटेलिङ वाल दयेकेगु ज्या जुयाच्वंगु वय्कलं ‘नेपालभाषा टाइम्स’यात कनादिल ।

म्हय्पि देगः दुगु लागा जंगलया जःखः भूक्षय जुइगु क्रमय् दुगु व थुकिं यानाः देगः तकं क्षति जुइ फइगु जूगुलिं उकियात पनेत रिटेलिङ वाल दयेकेमाःगु हथाय् जुइधुंकूगु वय्कलं कनादिल ।

थुकथं हे प्रदेश सांसद मानन्धरया सक्रियाताय् येँ मनपा १६ वडाया थीथी थासय् ५ मेगा पिक्सेलया क्यामरा जडान यायेगु ज्या नं जूगु दुुसा थीथी थासय् सार्वजनिक चःबि दयेकेगु ज्या नं न्ह्यानाच्वंगु वय्कलं कनादिल । अथे हे म्हय्पि लागाया मनाङ गल्ली, दीपशिखा मार्ग व जनमार्गय् नं तःदँ न्ह्यवंनिसें स्यनाच्वंगु सतकयात थःगु हे कुतलं याकनं सतक पीच यायेगु ज्या न्ह्याकेत्यनागु नं वय्कलं कनादिल ।