ने. सं. ११४६ अनलाथ्व नवमी -

संस्कृति संरक्षणया निंतिं लाखे प्याखं कासा

येँ – तनहुँ जिल्लाया भीमादस्थित भिष्म नेवार समाजया ग्वसालय् लाखे प्याखं कासा जुल । समाजं लाखे प्याखंया संरक्षण यायेगु उद्देश्यं थीथी जिल्लाय् च्वनाच्वंपिं नेवाः समुदायया दथुइ उकथं लाखे प्याखं कासाया ग्वसाः ग्वःगु खः । उगु कासाय् कास्कीया बालगोपाल सेवा समिति न्हाप लाःगु खःसा तनहुँया छंगेली नेवाः खलः दमौली लिउ, कास्कीया देउराली नेवाः खलः व ख्वपया विश्वकर्मा लाखे समाजं हःपाः सिरपाः त्याकेत सफल जूगु दु ।

अथे हे भेषभूषपाखे भिमसेन सेवा समाज (तनहुँ) व अनुशासनय् नेवार समाज (तनहुँ) उत्कृष्ट घोषित जूगु दु । कासाय् न्हाप लाःगु पुचःयात पीद्वः, लिउयात नीन्याद्वः व हःपाः सिरपाः त्याकेत सफल निगुलिं पुचःयात प्यद्वः, प्यद्वः तका दां सिरपाः लःल्हाःगु खः । कासाय् विजयी जुयादीपिंत नेवाः देय् दबूया नायः नरेश ताम्राकारं सिरपाः लःल्हानादीगु खः ।

सिरपाः लःल्हनादिसें देय् दबूया नायः ताम्राकारं नेवाः समुदायया संस्कृतिइ वैज्ञानिकताय् आधारित जूगु खँ धयादिल । कासाय् न्हाप लाःगु छंगेली नेवाः खलः दमौलीया नायः क्या. तारालाल श्रेष्ठं लाखे प्याखं संरक्षण यायेगु उद्देश्यं थुकथं कासाया ग्वसाः ग्वयेगु ज्या सकारात्मक जूगु विचाः प्वंकादिल ।

समाजं नेवाः समुदायया मौलिक संस्कृति व पहिचानया रुपय् दयाच्वंगु लाखे प्याखं लोप जुया वनाच्वंगु धासें उकिया संरक्षण यायेगु नापं न्हू पुस्तायात प्याखं लःल्हायेगु उद्देश्यं उकथं कासाया ग्वसाः ग्वयागु जानकारी बिउगु दु । समाजया अध्यक्ष राजकुमार श्रेष्ठं गुगुं इलय् अतिकं लोकंह्वाःगु लाखे प्याखं लिपांगु इलय् लोप जुय वनाच्वंगुलिं उकिया संरक्षण यायेगु निंतिं कासाया ग्वसाः ग्वयागु धयादिल ।

लिसें वय्कलं लाखे प्याखंया संरक्षण यानाः उकियात न्हू पुस्तायात लःल्हायेमाःगु थौंया आवश्यकता जूगु नं धयादिल । उगु कासाय् तनहुँलिसें पाल्पा, येँ, ख्वप, कास्की, स्याङ्जाया थीथी नीन्यागू पुचलं ब्वति काःगु कासाया संयोजक महेन्द्रकुमार श्रेष्ठं जानकारी बियादिल ।