संघनायकया अन्तिम संस्कार आइतवाः

येँ -मदुम्ह संघनायक भिक्षु ज्ञानपूर्णिक महास्थविरया अन्त्येष्टि आइतवाः याइगु जूगु दु । वसपोल शुक्रवाः सुथय् ८१ दँया बैंशय् मदुगु खः ।
आइतवाः न्हिनय् १ बजे यलया शंखमुलय् बौद्ध संस्कार कथं वसपोलया अन्त्येष्टि याइगु ज्याझ्वः दु ।

कोभिड–१९ या कारणं यक्व मनूत छथासं मुने मजिउगुलिं सामाजिक दूरी कायम यानाः शवयात्रा न्ह्याकेगु व अन्त्येष्टि ज्याझ्वः याइगु खँ धाःगु दु ।अथे हे खुसिइ यायेमाःगु गुलिखे अन्त्येष्टि कर्म विश्वशान्ति विहारय् हे सम्पन्न यायेगु ग्वसाः जुयाच्वंगु दु । वसपोलया शवयात शुक्रवाःनिसें अन्तिम श्रद्धांजलिया लागिं विश्वशान्ति विहारय् हे तयातःगु खः ।

संघनायक भिक्षु ज्ञानपूर्णिक महास्थविर मदुगु दुःखय् राष्ट्रपति विद्यादेवी भण्डारी व प्रधानमन्त्री केपी शर्मा ओलीं नं शोक सन्देश बियादीगु दु ।राष्ट्रपति भण्डारीं बियादीगु शोक सन्देशय् अहिंसा, करुणा, मैत्री व शान्ति थेंज्याःगु बुद्धया कालजयी सन्देशयात प्रवद्र्धन यायेत महत्वपूर्ण भूमिका म्हिताबिज्याःम्ह भिक्षु ज्ञानपूर्णिक महास्थविरया निधनं तःधंगु क्षति जूवंगु खँ धयातःगु दु ।

अथे हे प्रधानमन्त्री केपी ओलीया शोक सन्देशय् संघनायक भिक्षु ज्ञानपूर्णिक महास्थविरं क्यनाबिज्याःगु ज्ञानया लँपु सदां अनुकरणीय जुइ धयातःगु दु ।