कोरोनाया दथुइ न्हूदँ ज्याझ्वः

बसन्तपूया पलेसा थौं राष्ट्रिय सभागृहय् भिंतुना सभा

येँ (नेपालभाषा टाइम्स) – नेपाल संवत् ११४१ या न्हूदँ थौं स्वनिगः लिसें देय्न्यंकं थीथी ज्याझ्वः यासें न्यायेकाच्वंगु दु । थुगुसी कोरोना संक्रमणया कारणं स्वनिगः दुने सामाजिक दूरी कायम यासें सार्वजनिक ज्याझ्वःत मयासे न्हूदँ हनेगु ज्या जुयाच्वंगु दु ।

थ्व झ्वलय् थौं न्हूदँ राष्ट्रिय समारोह समितिपाखें येँया राष्ट्रिय सभागृहय् छगू ज्याझ्वः याइगु जूगु दु । ज्याझ्वलय् प्रधानमन्त्री केपी ओली मूपाहां कथं झाइगु ग्वसाः दुगु खँ समारोह समितिं धाःगु दु। उखे थिमिया शंखधर चोकय् च्वंगु राष्ट्रिय विभूति शंखधर साख्वाःया झ्वाताय् स्वां देछायेगु ज्याझ्वः दुगु खँ नं धाःगु दु। ज्याझ्वलय् प्रधानमन्त्री मूपाहांया रूपय् वये मफुसां नेपाल सरकारया छम्ह मन्त्री धाःसा सहभागी जुइगु खँ ग्वसाः खलः शंखधर साख्वाः प्रतिष्ठानं धाःगु दु ।

अथे हे न्हूदँया लसताय् यल व ख्वपय् जुइगु सार्वजनिक ज्याझ्वःत नं स्थगित याःगु दु । अथे खःसां अन सामाजिक दूरी कायम यानाः चिचीधंगु ज्याझ्वःत जुइगु खँ धाःगु दु । न्हूदँया लसताय् लाकाः थीथी खलः पुचःतय्सं भर्चुयल ज्याझ्वःत धाःसा यानाच्वंगु दु । गुलिं संस्थातय्सं संवाद व गुलिस्यां साहित पाठया ज्याझ्वःत याःगु दु ।

थुगुसी न्हूदँया लसताय् सामाजिक सञ्जालपाखें भिंतुना कालबिल यायेगु ज्या धाःसा प्रशस्त जूगु दु । सामाजिक सञ्जालपाखें भिंतुना कालबिल यायेगु लागिं थीथी संघ संस्थातय्सं ईकार्ड दयेकाः सञ्जालय् तयेगु ज्या यानाच्वंगु दु। थुकिं यानाः कार्ड तयाः भिंतुना कालबिल यायेत अःपुगु दु ।  सार्वजनिक ज्याझ्वः मयाइगु जूगुलिं थुगुसी न्हूदँया सफू, सीडी, क्यालेण्डर, टीशर्ट आदि पिथनेगु ज्या धाःसा कम जूगु दु ।

सम्बन्धित बुखँ

LEAVE YOUR COMMENTS