कुमारीया नियमित दर्शन अझं बन्द

येँ – म्हिगः दशमि कुन्हु कुमारी माजुया नियमित गोप्य पुजा जुल । थ्व पुजा हरेक दशमि कुन्हु लछिया निक्वः कुमारी छेँय् हे गोप्य रुपं जुइ ।सिखंमूबहाःया पञ्चबुद्धपाखें थ्व पुजा जुइगु खः । कोरोना ल्वय् या कारणं कुमारी माजुया मेगु विशेष पुजाआजा बन्द जूसां लय् निक्वः जुइगु थ्व गोप्य पुजा धाःसा बन्द मजू ।

वंगु चैत्र ११ गते सरकारं लकडाउन लागू जुइवं देय्या फुक्कं लागाय् च्वंगु देगः, चैत्य, विहार बन्द याः थें कुमारी छेँय् श्री कुमारीया दर्शन नं बन्द याःगु खः । थ्व थौं तक नं बन्द हे तिनि । कुमारी छेँया भाजु गौतम शाक्यं कनादी कथं म्हिगःनिसें लकडाउन छुं भचा छ्वासुकेगु धकाः सरकारं निर्णय याःसां नं देवस्थलत खुल्ला यायेगु धकाः मधाःनिगु कारणं कुमारीया दर्शन नं अझं खुल्ला यायेगु ग्वसाः मदुनि ।

अथे खःसां भाकल यानातःपिं वा क्यं वंथाय् कुमारी माजुयात पुजा याना बिउ धयाहःपिं मनूतय्त धाःसा कुमारी माजुया पूजा याके बियाच्वनागु खँ शाक्यं कनादिल । लकडाउनजःछि कुमारीया विशेष पुजाआजा लिसें कुमारी माजुया स्कूलया कक्षा नापं बन्द जूगु खः । अथे खःसां न्हिंन्हिं यायेमाःगु वसपोलया नित्यपूजा धाःसा त्वःमफिक जुयाच्वंगु खँ नं शाक्यं कनादिल ।

कुमारी माजुया नित्यपूजा बुद्ध धर्म कथं पञ्चबुद्धया प्रतिक वज्राचार्यपाखें व हिन्दू धर्म कथं तलेजुया आचाजुपाखें अलग अलग हे याइगु चलन दु। थ्व नित्यपुजा धाःसा लकडाउनया इलय् नं बन्द मजू । लकडाउनया इलय् हे निगू तःधंगु जात्राय् कुमारी माजुयात पित यंकेमाःगु खःसा थुगुसी व नं बन्द जुल । पाहाँचःह्रेया घोडेजात्रा व जनबहाःद्यःया रथ सालीबलय् कुमारी माजुयात बिज्याकेमाःगु खः । थुगुसी घोडेजात्रा व जनबहाःद्यःया रथ सालेगु जात्रा नितां मजूगुलिं कुमारी माजुयात नं बिज्याकेम्वाःल ।