ग्वलय् ख्वपया नवदुर्गा द्यःया गंप्याखं

येँ (नेपालभाषा टाइम्स) – ख्वपया नवदुर्गा द्यःया गंप्याखं येँया ग्वलय् (जयबागेश्वरीइ) क्यनेगु ज्या जूगु दु । थुगुसी कोरोना भाइरस संक्रमणया जोखिमया कारणं सीमित व्यक्ति उपस्थितिइ नवदुर्गा द्यःया गंप्याखं क्यनेगु ज्या जूगु खः ।

ख्वपया नवदुर्गा द्यःया गंप्याखं दँय्दसं थिंलाथ्व नवमिकुन्हु ग्वल देशय् वयाः प्याखं क्यनाः मोक्षदा एकादशिया दिंकुन्हु लिहां वनीगु चलन दु । मल्लकालीन इलय् जुजु रणजीत मल्लया पालय् शुरु जूगु धयातःगु नवदुर्गा द्यःया गंप्याखनय् नवदुर्गा, भैरव, गणेश लगायत थीथी द्यःपिं दुथ्यानाच्वंगु दु । प्याखं क्यनेगु निंतिं ख्वाःपाःसहित नवदुर्गा द्यः गंछिं ख्वपया लाय्कूनिसें ग्वल देय्तक न्यासि हे वयेगु चलन दु ।

थुकथं न्यासि वयेगु झ्वलय् ताँ पुलेमाःगु दुसा तां मवँसे खुसि हे छिनाः वनेमाःगु नियम दुगु ग्वल देय्या संस्कृति विषयया अध्ययेता मुकुन्दराज वैद्यं कनादिल । प्याखं क्यनेत ख्वप लाय्कूनिसें न्यासि वयेगु झ्वलय् त्रिभुवन अन्तर्राष्ट्रिय विमानस्थलया रनवेपाखें वनेगु व उगु हे लँपु जुयाः लिहां वयेगु याइ । थौं स्वयां निसःदँ न्ह्यः पुलांगु गंप्याखंया लँपुइ विमानस्थल निर्माण जूसां नं उगु हे लँपु जुयाः वये वने याना वयाच्वंगु खः ।

ग्वल देशय् प्याखं क्यनेगु झ्वलय् नवदुर्गा द्यः गंछिं नवमि व दशमि निन्हु निचा जयबागेश्वरीस्थित नवदुर्गा द्यःया दबू न्ह्यःने च्वंगु द्यःछेँय् च्वनेगु याइ । प्याखं क्यनेगु निंतिं न्हापा लिपा जूसा निसः स्वयां अप्वः गणया जःपिं वयेगु यानाच्वंगु खःसा थुगुसी कोरोना महामारीया कारणं न्यय्म्हेसिया ल्याखय् जक वयाः विधि पूवंकेगु ज्या जूगु खः । जयबागेश्वरीइ वयेधुंकाः द्यःगंछियात पशुपति अमालकोट कचहरीपाखें बलिसहित पुजा बीगु परम्परा दु ।

सम्बन्धित बुखँ

LEAVE YOUR COMMENTS