लोचनचारा व डा. रीनाया च्यागू सफू पितब्वज्या

येँ (नेपालभाषा टाइम्स) – नेपालभाषा साहित्य व बौद्ध धर्मया ख्यलय् नांजाःपिं निम्ह मिसा च्वमिया च्यागू सफू छन्हुं हे छगू ज्याझ्वलय् पितब्वज्या याःगु दु । चम्पादेवी स्मृति मेडिटेशन धम्म ग्रुपया ग्वसालय् थन जूगु छगू ज्याझ्वःया दथुइ लोचनचारा तुलाधर व डा. रीना तुलाधर बनियाया च्यागू सफूया पितब्वज्या याःगु खः ।

पुचःया दुजःतकं जुयाच्वनादीपिं लोचनतारा तुलाधरया निगू व डा. रीना तुलाधर बनियाया खुगू सफूया पितब्वज्या याःगु खः । ज्याझ्वलय् लोचनतारा तुलाधरया खय् भाय्या ‘नेपालमा थेरवाद धर्म र पालि भाषाको विकास’ व नेपालभाषाया बाखं मुना ‘सिमा मदुगु गुँ’, डा. बनियाया खय् भाय्या ‘पालि भाषा सिकौं’, ‘रागाग्नी’ (उपन्यास), ‘अभिमन्यूया पुनर्जन्म’ (उपन्यास), बाखं मुना सफू ‘गणेद्यःया विलाप’, ‘मनोपुब्बङ्गमा धम्मा – भाग १’ व ‘ मनोपुब्बङ्गमा धम्मा – भाग २’या पितब्वज्या याःगु खः ।

नेपालभाषा मिसा खलःया पुलांम्ह नायःलिसें संरक्षक सुवर्णकेशरी चित्रकार मूपाहांकथं झायादीगु खः । ज्याझ्वलय् मूपाहां चित्रकारलिसें प्रा. अमृतमान सिंह बनिया, सह प्राध्यापक मदनरत्न मानन्धर, साहित्यकार, समालोचक डा. पुष्पराज राजकर्णिकार, वरिष्ठ निबन्धकार, साहित्यकार रमेशकाजी स्थापित, वरिष्ठ कवयित्री प्रतिसरा साय्मि, थेरवाद बुद्धिष्ट एकेदेमिया प्राचार्य डा. त्रिरत्न मानन्धर, अष्टमान सिं बनियापिंसं उगु सफू मंकाःकथं पितब्वज्या यानादीगु खः ।

पितब्वज्या जूगु सफूयात सफू पितब्वज्या यानादीपिं नापं नेपालभाषा एकेदेमिया चान्सलर मल्ल के. सुन्दरं समीक्षा यानादीगु खः ।

मूपाहां चित्रकारलिसें निम्हं मिसा च्वमिपिंसं नं थःथःगु नुगःखँ तयादीगु ज्याझ्वलय् फाउण्डेसनया निर्मलमान तुलाधरं लसकुस यानादीगु खःसा मीना तुलाधरं सुभाय् देछानादीगु खः ।