आरआरय् नं नेपालभाषा ब्वनीपिं अप्वया वल

येँ -थनया आरआर क्याम्पसय् नं नेपालभाषा ब्वनीपिं विद्यार्थीत अप्वया वःगु दु । अन विद्यार्थी भर्नाया लागिं थौं तक फारम बुझे यायेगु अन्तिम ई बियातःगु खः । अनया प्राध्यापक डा. चन्द्रमान वज्राचार्यं कनादीकथं आः भर्ना जुइपिं विद्यार्थीतय् ल्याः २५ म्ह थ्यंगु दु । छुं विद्यार्थीत अझ लिपा नं वयेफुगु अनुमान वय्कलं यानादीगु दु ।

अथे हे थुगुसी पाटन क्याम्पसया नेपालभाषा केन्द्रीय विभागय् नं भर्ना जुइपिं विद्यार्थीतय् ल्याः ५० म्ह स्वयां अप्वः थ्यंगु खँ सीदुगु दु । अन विद्यार्थी ल्याः अप्वयाः आः सेक्सन विभाजन याये मालेफुगु खँ धाःगु दु ।

येँ मनपा, किपू नपा लगातया स्थानीय निकायं विद्यालयय् नेपालभाषाया माध्यमं स्थानीय विषय ब्वंकेगु शुरु यायेवं उच्चशिक्षाय् नेपालभाषा ब्वनीपिं अप्वया वःगु खः ।