एकेदमिपाखें स्वंगू सफू पितब्वज्या

यल (नेपालभाषा टाइम्स) – नेपालभाषा एकेदमिया ग्वसालय् छगू ज्याझ्वःया दथुइ स्वंगू सफूया पितब्वज्या जुल । सफूया पितब्वज्या एकेदमिया संरक्षक वाब्मय शताब्दीपुरुष डा. सत्यमोहन जोशीं यानादीगु खः ।

एकेदमिया उपकुलपतिनापं साहित्यकार यज्ञरत्न धाख्वाया सभापतित्वय् जूगु ज्याझ्वलय् मूपाहां जोशीं बागमति प्रदेश सामाजिक विकास मन्त्रालयया ग्वाहालिं पिदंगु एकेदमिया ख्वाःपौ ‘नेवाः प्रज्ञा’ प्यंगूगु ल्याः च्वमि यज्ञरत्न धाख्वाया बाखं मुना सफू ‘चंअजि’ व प्रा. डा. चन्द्रमान वज्राचार्यया समालोचना च्वसु मुना सफू ‘ल्हाःचिं’या पितब्वज्या यानादीगु खः ।

मूपाहां जोशीया निवासस्थानय् दयेकाच्वंगु निर्माणाधीन लोक साहितय परिषद्या भवनय् उगु ज्याझ्वः जूगु खः । एकेदमिया प्राज्ञ दुजः विजयरत्न असंबरे लसकुस यानादीगु ज्याझ्वलय् नवासें मूपाहां जोशीं नेपालभाषाया साहित्य नं विश्वया गुगुं नं देय् व भाय्या साहित्य स्वयां म्हो मजू धासें नेवाः साहित्ययात नं विश्वया मेमेगु भासं भाय् हिलाः विश्व साहित्यया ख्यलय् थ्यंके लिबायेधुंकूगु खँ कुलादिल ।

ज्याझ्वःया सभापति धाख्वां अंग्रेजी भासं मोडर्न स्टोरी धकाः धाइगुयात हे झीसं चिबाखं धायेगु याना वयाच्वना धासें थ्व निगूलिं छगू मखु धयादिल । वय्कलं बाखंया परिभाषा न्ह्यागु हे जूसां मू खँ बाखं च्वयेगु खः धयादिल । पितब्वज्या जूगु सफूया च्वमि प्रा. डा. वज्राचार्यं साहित्यया थीथी सिद्धान्तया बारे चर्चा यानादीगु ज्याझ्वलय् निर्माणाधीन लोक साहित्य भवनया निंतिं समाजसेवी मोतिलाल शिलप्कारं न्ययय्छद्वः तका व उपकुलपति धाख्वां छगू लाख तका ग्वाहालि नं लःल्हानादीगु खः ।