पाहांचःह्रेया द्यः मल्वाकीगु

येँ – कोरोना भाइरसया लिच्वः देय्या अर्थतन्त्र व समाजय् जक मखु परम्परांनिसें न्ह्याना वयाच्वंगु जात्रा पर्व थेंज्याःगु सांस्कृतिक ज्याखँय् नं लाःगु दु । थ्व झ्वलय् न्ह्यःने वयाच्वंगु पाहांचः¥हेबलय् द्यः ल्वाकीगु जात्रा थुगुसी मयाइगु जूगु दु । पाहांचः¥हेबलय् येँया तिंख्यलय् व असनय् द्यः ल्वाकेगु जात्रा याइगु खः । थुगुसी थ्व नितां जात्रा मयायेगु निर्णय सम्बन्धित गुथितय्सं याःगु खः । कोरोना भाइरसया संक्रमण न्यना वनाच्वंगु व मनूत भीडभाड जुइगु थासय् थ्व याकनं पुनीगु सम्भावना दु धाःगुलिं थुगुसी भीडभाड जुइक जात्रा मयायेगु निर्णय गुथिं याःगु खः ।

तर तिंख्यलय् व असनय् द्यः ल्वाकेगु जात्रा मजूसां जात्राय् पिकायेमाःपिं द्यःपिंत पिकयाः खतय् तयाः परम्परागत रुटय् चाःहीकेगु ज्या धाःसा जुइ धाःगु दु । थुकिया बारे श्री लुँमधि भद्रकाली तेबहाः, श्री लुँमधि भद्रकाली वटु व श्री कंकेश्वरी कंगया सम्बन्धित गुथिया दथुइ सहलह यासें थ्व निर्णय याःगु खः ।

थुकिया बारे गुथिं छगू पर्चा हे पिकासें आः जुइगु जात्राया बारे जानकारी याःगु खः । आः चैत्र १० गते सोमवाः तेबहालय् द्यः गमं थनाः खिचापुखू, न्हूसतक, भद्रकालीइ थ्यंकाः द्यः गमय् बिज्याकेगु, ११ गते द्यःयात न्हूसतक, तेबहालय् चाःहीकेगु व १२ गते तेबहालय् बाजं थानाः द्यःयात लसकुस पुजा यानाः थुगुसीया जात्रा बन्द यायेगु ज्याझ्वः समेत पित बिउगु दु । मेपिं द्यःपिं नं थःथःगु लागाय् चाःहीकाः जात्रा बन्द याना छ्वइगु खँ धाःगु दु ।

द्यः जात्राया झ्वलय् बाजं थानाः चाःहीकेगु ज्या धाःसा जुइ । दँय्दसं थें तःधंगु उत्सव मजुइगु खँ धाःगु दु । द्यःयात खतय् तयाः चाःहीकीबलय् नं यक्व मनूत मवँसे मदयेक मगाःपिं जक वनाः चाःहीकेगु ग्वसाः दयेकूगु दु । तेबहाःया गुथिं ला थुगुसी थःपिनि सी गुथि तकं भ्वय् मयासे न्यायेकूगु खँ सीदुगु दु । भ्वय् यायेबलय् यक्व मनूत मुने मालीगु जूगुलिं पुजा जक यानाः सीगुथि न्यायेकूगु खँ धाःगु दु ।