५० किलोया यःमरि दयेकाः ब्वज्या

येँ (नेपालभाषा टाइम्स) – पद्म सुगन्ध क्लबं थिंलाथ्व यःमरि पुन्हिया लसताय् ५० किलोया यःमरि दयेकाः ब्वज्या याःगु दु । क्लबया ग्वसालय् थ्व हे वंगु पुस १५ गते यःमरि पुन्हिकुन्हु ५० किलोया यःमरि दयेकाः ब्वज्या याःगु खः ।

‘झीगु संस्कृति, झीसं ल्यंके नु’ धइगु नारा बियाः थनया बसन्तपूस्थित महाद्यः पार्वती दबुलिइ कलात्मक रुपं यःमरि दयेकाः ब्वज्या याःगु खः । ज्याझ्वःया उलेज्या मूपाहांकथं झायादीम्ह येँ महानगरपालिकाया उपप्रमुख हरिप्रभा खड्गी श्रेष्ठं यःमरि पुज्यानाः त्वाःदेवाय् मत च्याकाः यानादीगु खः ।  ज्याझ्वलय् विशेष पाहांकथं बागमति प्रदेशया प्रदेशसभा सदस्यपिं विराजभक्त श्रेष्ठ व वसन्तप्रसाद मानन्धर, रंजित चुक पुचःया नायः सुमितदास रंजितकार, जागरुक युवा समूहया न्वकु विभूति मानन्धर झायादीगु खः ।

येँ मनपा वडा नं. २१य् च्वंगु थुगु क्लब स्वनिगलय् न्यनाच्वंगु कला, संस्कृति, सम्पदा व भाषाया संरक्षणया निंतिं स्थानीय ल्याय् म्हतय्त सक्रिय यायेगु ल्याखं पलिस्था यानागु जानकारी क्लबया नायः दामोदरलाल कारंजितं जानकारी बियादिल । थीथी व्यक्तित्वपिंसं नुगःखँ प्वंकादीगु ज्याझ्वलय् यःमरि पुन्हिया महत्व व थुकिया विशेषता बारे जानकारी बीगु ल्याखं खस् भाषा व अंग्रेजी भासं च्वयातःगु ब्यानर नं ब्वज्या याःगु खः ।

सम्बन्धित बुखँ

LEAVE YOUR COMMENTS