ने. सं. ११४६ अनलागा एकादशी - परमा एकादशि

चीभाः चैत्य संस्थापाखें वाच डे हन

येँ (नेपालभाषा टाइम्स) – स्वनिगःलिसें नेपाःया चीभाः व चैत्य संरक्षण, संवद्र्धन व प्रवद्र्धन यायेगु तातुनाः नीस्वनातःगु चीभाः चैत्य संस्थापाखें वंगु शनिवाः ‘वाच डे-२०२०’ हन । वर्ल्ड मोनुमेन्ट्स फन्डलिसेया सहकार्यय् चीभाः चैत्य संस्थां सम्पदा संरक्षण व महत्वयात प्रवद्र्धन यायेगु ल्याखं वाच डे-२०२० हंगु खः ।

वर्ल्ड मोनुमेन्ट्स फन्ड विश्वया चीभाः चैत्य थेंज्याःगु ऐतिहासिक, धार्मिक, सामाजिक व सांस्कृतिक महत्वया सम्पदा संरक्षणया निंतिं सक्रिय जुयाच्वंगु अन्तर्राष्ट्रिय संस्था खः । थ्व हे वल्र्ड मोनुमेन्ट्सं थुकथंया महत्वपूर्णगु सम्पदाया नं संरक्षण याना तयेमाःगु आवश्यकतायात वाःचायेकाः स्वनिगःया चीभाः चैत्ययात ‘वाच लिस्ट-२०२०’ या धलखय् दुथ्याकूगु संस्थां जानकारी बिउगु दु ।

वर्ल्ड मोनुमेन्ट्सं फन्डं सम्पदा सरक्षणय् ज्या याना वयाच्वंगु संस्था स्वनिगःया चीभाः व चैत्ययात थःगु ‘वाच लिस्ट-२०२०’ लय् सरंक्षण याना तयेमाःगु महत्वपूर्णगु सम्पदाया धलखय् दुथ्याकूगु संस्थाया सचिव अमर तुलाधरं ‘नेपालभाषा टाइम्स’ यात कनादिल ।

चीभाः व चैत्यत स्वनिगःनापं थीथी थाय् व अनया वासिन्दातय् निंतिं पुरातात्विक, ऐतिहासिक, सामाजिक व आर्थिक रुपं नं अतिकं महतवपूर्णगु सम्पदा जूगु वय्कलं कनादिल । थज्याःगु चीभाः व चैत्यनापं संस्कृतिं यानाः हे स्वनिगःयात देगःया देगलं जाःगु सहर नां बिउगु जक मखसे स्वनिगः छगू म्वानाच्वंगु संग्रहालय नं जूगु वय्कःया धापू दु ।

फन्डं नेपाःया चीभाः व चैत्ययात महत्व बियाः हे वाच लिस्टया धलखय् दुथ्याकूगुलिं वंगु शनिवाः उकथं वाच डे हनेज्या याःगु खः । वाच डे हनेगु झ्वलय् संस्थाया सीमित दुजःपिं मुनाः स्वयम्भू महाचैत्य लगायत स्वयम्भू जःखः च्वंगु चीभाः व चैत्य सुचुकुचु याःगु खः ।

सचिव तुलाधरं कनादीकथं कोरोना महामारीयात ध्यानय् तयाः समाजिक दूरी सतर्कता नालाः करिब २५ म्ह जक मुनाः स्वयम्भूया चीभाः चैत्य सुचुकुचु यायेगु नापं अन वःपिं सर्वसाधारणयात चीभाः व चैत्यया महत्व बारे जानकारी बीगु, प्रवद्र्धनात्मक सामग्रीलिसें मास्क नं वितरण याःगु खः । लिच्छवीकाल स्वयां न्हापानिसें दुगु चीभाः व चैत्य स्वनिगलय् जक २५००या हाराहारीइ दुगु संस्थाया अनुमान दु ।