मदिक्क वा वःगुलिं झिंन्हय्म्हेसिया ज्यान वन, हनुमन्ते खुसिइ चुइकूम्हेसिया उद्धार

स्वन्हु न्ह्यवनिसें मदिक्क वयाच्वंगु वां यानाः देन्यंकं झिंन्हय्म्हेसिया ज्यान वनेधुंकूगु दु । तसकं वाः वया थीथी थासय् खुसिबाः वयेगु, चलः वनेगु जुइवं येँ, खोटांग, ओखलढुंगा,पर्सा, रामेछाप, सिन्धुली, मकवानपुर, यल व धादिंग ज्यान वंगु खः । येँ व खोटांगय् स्वम्ह स्वम्ह सीगु दुसा मेगु जिल्लाय् छम्ह छम्हेसिया ज्यान वंगु दु । अथेहे येँ, पाँचथर, इलाम, मोरंग, सुनसरी, महोत्तरी, रौतहतय् यानाः न्हय्म्ह छनाच्वंगु दु । येँ कागेश्वरी मनहरा नगरपालिकाया मूलपानीइ तसकं वा वया छेँया पखाः दुना वयेवं निलु यादव, शर्मिला यादव व कुन्दन यादवया ज्यान वंगु खः ।

हनुमन्ते खुसिं चुइकूम्हेसिया उद्धार
मेखे ख्वपय् हनुमन्ते खुसिं चुइकः यंकूम्ह छम्ह मनूयात धाःसा प्रहरीं उद्धार याःगु दु । ख्वपया बालकोट पाखे हनुमन्ते खुसिया सिथं वनाच्वंगु इलय् बालकोटय् हे च्वनाच्वंम्ह ३२ दँया सन्तोष पहरीयात चुइका यंकूगु खः । खुसिं चुइकः यंकेवं स्थानीय व महानगरीय प्रहरी प्रभाग ख्वपया प्रहरीया सक्रियताय् वयात उद्धार याःगु खः । पहरीयात नागरिक अस्पताल गठ्ठाघरय् उपचारया निंतिं यंकूगु खः ।

ख्वपया हनुमन्त खुसिइ खुसिबाः वयेवं खुसि सिथय् च्वनाच्वंपिं मनूत छेँ त्वःताः सुरक्षित थासय् वंगु दु । खुसिया लः थहां वयाः जगाती, हनुमानघाट, चुपिनघाट, सल्लाघारी, राधेराधे, बालकोट, सागबारी लगायतया थासय् लः दुहां वयेवं स्थानीयत सुरक्षित थासय् वंगु खँ प्रहरीं धाःगु दु । अथेहे बालकोटया न्हूगु बेलिब्रिज व मध्यपुर थिमिया दधिकोट स्वाइगु ताँ नं त्वःधुइगु अवस्थाय् थ्यंगु दु ।

सम्बन्धित बुखँ

LEAVE YOUR COMMENTS