आसामय् न्हापांगु नेवाः सम्मेलन

येँ – भारतया आसाम राज्यय् नेवाः सम्मेलन क्वचाःगु दु । वंगु फागुन २७ गते उगु सम्मेलन जूगु खः । आसाम राज्यया उदालगुडी जिल्लाया सामराङ धइगु थासय् उगु सम्मेलन जूगु खः ।

सम्मेलनय् नेपाःया प्रतिनिधित्व यासें आसाम झायादीम्ह संस्कृतिविद् भाजु गणेशराम लाछिं रिबन चानाः ज्याझ्वःया उलेज्या यानादीगु खः । अथेहे ज्याझ्वलय् झण्डोत्तोलन आसाम नेवाः संगठनया नायः भाजु वंशीधर नेवारं यानादीगु खः । उगु उम्मेलनय् भारतया थीथी थासय् च्वंपिं नेवाःया लिसें भूटानया नेवाःतय्सं नं ब्वति काःगु खः ।

ज्याझ्वलय् नेपालं वःपिं नेवाःतय्सं नेवाः तिसा वसः, बाजं व नेवाः नसाया स्टल तयाः नेवाः ब्वज्या याःगु खः । उगु स्टलया अवलोकन यायेगु निंतिं आसाम राज्य सरकारया प्रतिनिधिपिं वःगु खः । उगु इलय् अन लाखे प्याखं नं हुइकेगु ज्या जूगु खँ भाजु लाछिं ‘नेपालभाषा टाइम्स’ यात कनादिल ।

सम्मेलनय् म्हपुजा यायेगु निंतिं माःगु हलंज्वलं सहित मन्दः दयेकाः ब्वयातःगु खःसा अथेहे निम्ह मस्त तयाः इही यायेगु, बारा तयेगु व भिंद्यः पुजा यायेगु ज्या नं जूगु खः ।

आसामया ३३ गू जिल्ला मध्ये १९ गू जिल्लाय् नेवाः संगठन चायेकातःगु दुसा २३ गू जिल्लाय् नेवाःतय् बसोबास दुगु जानकारी नं भाजु लाछिं बियादीगु दु । वय्कःया कथं आसाम राज्यय् जक नेवाःतय्गु ल्याः ४३ हजार दु । तर अनया नेवाःतय्सं थःगु भाय् ल्हाये मसःगुलिं नेपाःया प्रतिनिधियात भाय् लिसें नेवाः संस्कार व संस्कृति स्यनाबीत इनाप याःगु खँ नं वय्कलं कनादिल । वय्कलं बियादीगु जानकारी कथं याकनं हे आसाम राज्यया नेवाः प्रतिनिधिपिं नेपाः भ्रमणय् वयेत्यंगु दु ।