च्वमि प्रधानया पाश्चात्य समालोचनाया सिद्धान्त पिदन

येँ- नेपालभाषा एकेदमिया ग्वसालय् शुक्रवाः जूगु छगू ज्याझ्वःया दथुइ प्रा. नर्मदेश्वर प्रधानं च्वयादीगु ‘पाश्चात्य समालोचनाया सिद्धान्त’ नांया सफू पिदंगु दु । नापं उगु हे ज्याझ्वलय् एकेदमिया ख्वाःपौ ‘नेवाः प्रज्ञा’या निगूगु ल्याः नं सार्वजनिक याःगु खः ।

एकेदमिया चान्सलर चित्तरञ्जन नेपालीया सभापतित्वय् जूगु ज्याझ्वः एकेदमिया संरक्षक नापं वाङ्मय शताब्दी पुरुष सत्यमोहन जोशीं त्वाःदेवाय् मत च्याकाः उलेज्या यानादीगु खः । ज्याझ्वलय् मूपाहां कथं झायादीम्ह किपू नगरपालिकाया प्रमुख रमेश महर्जनं निगुलिं सफूया चिखिफ्यनाः सार्वजनिक यानादीगु खः ।

एकेदमिया सदस्य सचिवलिसें भाषिक न्ह्यलुवा मल्ल के. सुन्दरं लसकुस यानादीगु ज्याझ्वलय् पितब्वज्या जूगु पाश्चात्य समालोचनाया सिद्धान्त सफूया बारे एकेदमिया दुजः प्रा. प्रेमशान्ति तुलाधरं म्हसीका बियादीगु खःसा मेम्ह दुजः प्रा. डा. चन्द्रमान वज्राचार्य समीक्षा यानादीगु खः ।