लिपि प्रवर्द्धन अभियान क्वचाल
येँ – नेपाल लिपि गुथिया ग्वसालय् न्ह्यानाच्वंगु रञ्जना लिपि प्रवर्द्भन अभियान क्वचाःगु दु । स्वलायंकं न्ह्याःगु अभियान समापन ज्याझ्वलय् थुगु अभियानयात ग्वाहालि यानादीम्ह प्रदेश ३ या सांसद राजेश शाक्ययात हनापौ नं लःल्हाःगु खः ।
गुथिया नायः निरञ्जन ताम्राकारया सभापतित्वय् न्ह्याःगु ज्याझ्वलय् मूपाहां गुथिया संरक्षकनापं जनकवि दुर्गालाल श्रेष्ठं प्रदेश सांसद शाक्यलिसे अभियानय् ग्वाहालि यानादीपिं सुभाय् पौ लःल्हानादीगु खः । थुकथं हे नेपाल लिपि व रञ्जना लिपिया एप्स दयेकेत ग्वाहालि यानादीपिं नापं गुथिपाखे न्ह्याकाच्वंगु क्यालिजात्राय् ग्वाहालि यानादीपिंत नं सुभाय् पौ लःल्हाःगु खः ।
प्रदेश सांसद शाक्यया सांसद विकास कोषपाखे न्ह्याःगु नेपाल लिपि प्रवर्द्धन अभियान अन्तर्गत आनन्दकुमार महर्जन, पवनराजा महर्जन, अश्लेषा महर्जनं रञ्जना व नेपाल लिपिया एप्स व ट्युटोरियल भिडियो दयेकादीगु खःसा सुयोग्यरत्न ताम्राकार एप्स नापं क्यालिजात्रा, समिर कर्माचार्यं युनिकोडय् लिपि फन्ट, लिपिया ट्युटोरियल भिडियो, लिपि एप्स, क्यालिजात्रा व मछिन्द्र क्लबं आर्थिक ग्वाहालि यानादीगुलिं सुभाय् पौ लःल्हाःगु खः ।
अथे हे गुथिपाखे थीथी थासय् वनाः रञ्जना लिपिया प्रवर्द्धन यायेगु ल्याखं न्ह्याकूगु क्यालिजात्राय् ग्वाहालि यानादीपिंत नं सुभाय् पौ लःल्हाःगु खः ।
LEAVE YOUR COMMENTS