नेवाः खलः इजरायलया भर्चुअल मुँज्यां न्हूगु नेतृत्व ल्यल

येँ – इजरायलय् च्वंपिं नेवाःतय् संगठन राष्ट्रिय नेवाः खलः इजरायलया गुक्वःगु अधिवेशन जूगु दु। अधिवेशनं मय्जु विमला श्रेष्ठया अध्यक्षताय् खलःया न्हूगु नेतृत्वया नं ल्यज्या याःगु खः ।

विश्वन्यंकं महामारीया रुपय् न्यनावनाच्वंगु कोरोना (कोभिड-१९)या कारणं सकलें छगू हे थासय् मुनाः अधिवेशन यायेगु सम्भव मजुइवं ‘भर्चुअल’ मुँज्या च्वनाः खलःया अधिवेशन यानाः न्हूगु नेतृत्व ल्यःगु खः । कोरोना संक्रमणया कारणं ‘जूम’ अनलाइनपाखें च्वंगु मुँज्या खलःया अध्यक्ष मनु श्रेष्ठया सभापतित्वय् जूगु खःसा मूपाहांकथं नेफिन इजरायलया नायः तारा काउचा मगर झायादीगु खः । अथे हे विशेष पाहांकथं विश्व नेवाः संगठनया नायः सिजन श्रेष्ठ, नेवाः देय् दबूया नायः नरेशकुमार ताम्राकार लगायतं उगु भर्चुअल मुँज्या ब्वति कयादीगु खः।

खलःया छ्यांजे स्वस्तिका श्रेष्ठया लसकुस न्वचुपाखें न्ह्याःगु मुँज्याय् मूपाहां, विशेष पाहांपिंसं भिंतुना न्वचु तयादीगु खः । मुँज्यां खलःया न्हूगु ज्यासना पुचलय् स्वस्तिका श्रेष्ठ, राम प्रधान व कु्सुम श्रेष्ठयात छसिकथं वरिष्ठ, न्हापांम्ह व निम्हम्ह उपाध्यक्ष ल्यःगु दुसा राजकुमारी श्रेष्ठ मूछ्यांजे, ज्योति प्रधान छ्यांजे, टंक श्रेष्ठ दांभरिं, अमिरा थापा श्रेष्ठ लिउ दांभरिं व दुजलय् माया श्रेष्ठ, राजु श्रेष्ठ, शान्ता श्रेष्ठ, राधा प्रधान, बाबुकाजी श्रेष्ठ, कटक श्रेष्ठ, गंगा उदास लगायतयात ल्यःगु दु ।

अथे हे उगु मुँज्यां खलःया न्हूगु ज्यासना पुचःलिसें प्रमुख सल्लाहकार, सल्लाहकार व संरक्षक पुचः नं गठन याःगु खः ।