यँयाः नखःया धलः

थुगुसी यँयाः नखःया झ्वलय् यःसिं थनेगु लागिं जुइगु थीथी ज्याझ्वःया धलः तयार याःगु दु । थुगुसी थ्वहे वइगु असोज ५ गते सुथय् ८ः०५ बजे हनुमानध्वाखाय् यःसिं थनेगु निर्णय जूगु दु ।

थुकिया लागिं यःसिं काः वनेगु झ्वलय् कन्हय् भाद्र २६ गते मंगलवाः सुथय् ११ः४९ बजे साइत पिकयाः वन यात्राय् वनीगु ज्याझ्वः दु । कन्हय् हे बहनी ९ः२१ बजे सिमा पालेगु साइत पिकया तःगु दु ।

उकथं हे यःसिं सालाः असोज १ गते नगरय् दुत हइ । असोज ५ गते थंगु यःसिं असोज १२ गते नानिचायाः धुनेवं बहनी १०ः२७ बजे क्वःथलीगु ज्याझ्वः दु । यःसिं सम्बन्धी थ्व ज्याझ्वः केन्द्रीय मानन्धर संघं याइ ।

असोज ८ गते कुमारीया रथ क्वःने सालीसा असोज ९ गते थःने साली । पञ्चायक निर्णायक समितिं थ्व धलः तयार याःगु खः ।
थुगुसी कुमारी सालीकुन्हु बसन्तपुली नकतिनि दयेके सिधःगु गद्दी बैठकय् च्वनाः राष्ट्रपतिपाखें द्यः दर्शन याइगु खँ नं धाःगु दु । भुखाचं गद्दी बैठक स्यंगु इलय् राष्ट्रपतिं क्वय् हे च्वनाः कुमारी लिसें गणेश व भैरवया दर्शन यासें असर्फी छायेगु ज्या यानादीगु खः ।