असंबरेयात दुर्गादेवी पुण्य निरौला सिरपा
येँ – नेपाःया संकिपा ख्यःया नीजि क्षेत्रपाखें नीस्वंगु दकलय् न्हापांगु सिरपाः ‘हरितारा सिरपाः’ सोमवाः छगू ज्याझ्वःया दथुइ लःल्हात । म्हतिं नीन्याद्वः तकाया सिरपाः थुगुसी नांजाःम्ह टेलिफिल्म निर्देशक व कलाकार लय संग्रौला व नांजाःम्ह नायिका लिसें संकिपा निर्देशक रेखा थापायात लःल्हाःगु दु ।
अथेहे म्हतिं झिद्वः तका नगद सिरपाः कथं ‘दुर्गादेवी पुण्य निरौला स्मृति सिरपाः’ थुगुसी नांजाःम्ह बरिष्ठ सिने पत्रकार विजयरत्न तुलाधर असंबरे व कलाकार उत्तम केसीयात लःल्हाःगु दु ।‘हरितारा सिरपाः’या संरक्षक व हरितारा संकिपा सिरपाः समितिया नायः मनोज शम्शेर जवराया ट्वीन्स म्ह्याय्पिं मायांका राणा व माहिका राणाया सभापतित्वय् ज्याझ्वः न्ह्याःगु खः ।
वय्कःपिं निम्हं नांजाःपिं टेनिस कासामि खः ।सोमवाः जूगु उगु ज्याझ्वलय् नेपाःया न्हापांगु संकिपा ‘आमा’य् म्हितादीपिं स्वम्ह मिसा कलाकार चैत्यदेवी, भुवन चन्द, बसुन्धरा भुषालया लिसेलिसें नेपाःया न्हापांम्ह मिसाम्ह निर्देशक सुचित्रा श्रेष्ठ, न्हापांम्ह मिसा क्यामेराम्यान शबनम मुखिया व चलचित्र पत्रकार संघया उपाध्यक्ष गीता अधिकारीपिं विशिष्ट पाहाँ कथं झायादीगु खः ।
ज्याझ्वलय् ग्वसाः खलः परिवर्तन नेपालया कजि लिसें हरितारा सिरपाः समितिया सदस्य सचिव मोहन निरौलां लसकुस न्वचु बियादीगु खःसा सम्मानित जूपिं रेखा थापा व लय संग्रौलापिंसं नं नुगः खँ तयादीगु खः।
LEAVE YOUR COMMENTS