स्वदँ लिपा ब्रेकअप

बलिउड फिल्म उद्योगय् नायक वा नायिकाया दथुइ अफेयर चले जुइगु व ब्रेक अप जुइगु सामान्य खः । थ्व झ्वलय् बलिउड जोडीकथं कयातःपिं बलिउड अभिनेता टाइगर श्राफ व अभिनेत्री दिशा पटानीया स्वदँ न्ह्यःनिसेंया अफेयर आः वयाः ब्रेक अप जूगु दु । निम्हेसिया दथुइ लिपांगु इलय् मतभेद तच्वयेवं औपचारिक रुपं हे निम्हं अलग जूगु भारतीयसंचार माध्यमं न्ह्यथंगु दु ।

टाइगर व दिशाया दथुइ छु खँय् अपाय्सकं विवाद जुल अले सम्बन्ध ब्रेक अप यायेमाःगु तकया स्थितिइ थ्यन धइगु बारे छुं स्पष्ट मजूसां दिशाया बानी व्यहोरा व व्यवहारं टाइगर वाक्कदिक्क चायाच्वंगु धइगु सीदुगु दु । छगू कथं धायेगु खःसा दिशां टाइगरयात क्रुर शासन हे चले यानाच्वंगु भारतीय संचारमाध्यमया दावी दु ।

टाइगरं सुं मेपिं मिसात नापं खुले जुयाः न्हिउगु, इपिं नापं न्ह्यइपुक खँल्हाबल्हा यात धाःसा दिशायात तसकं असह्य जुइगु जुयाच्वन । उलि जक मखसे टाइगरया मोबाइलय् सुनां सुनां छु गज्याःगु सन्देश (म्यासेज) छ्वया हःगु दु धकाः नं स्वइगु जुयाच्वन । थनतक कि टाइगरयात फिल्मय् चुप्पा नयेगु दृश्य मबीगु प्रतिवद्धता प्वंकेमाःगु खःसा उखे दिशा धाःसा उच्छृंखल पहया वसः पुनाः जूसां टाइगर सुम्क च्वनाच्वनेमाःगु स्थिति दुगु जुयाच्वन ।