विप्लव व प्रहरीया गोली हानाहान

येँ – भोजपुरय् विप्लवया कार्यकर्ता व प्रहरी दथुइ गोली हाना हान जुयाः छम्ह प्रहरी व छम्ह छापामार सीगु खँ सीदुगु दु । उकी लानाः प्रहरी जवान सन्जिव राई व विप्लव समर्थक भोजपुर जिल्ला इन्चार्ज नीरकुमार राई सीगु खँ धाःगु दु । उकी लानाः छम्ह प्रहरी जवान घाःपाः नं जूगु दु ।

प्रत्यक्षदर्शीया कथं सिभिल ड्रेसय् याकःचा वयाच्वंम्ह प्रहरी जवान राईयात विप्लवया जिल्ला इन्चार्ज नीरकुमारं लितुमतु लिनाः छगू होटलय् थ्यंकाः गोलीं कयेकूगु खः । उगु हे इलय् अन थ्यंपिं प्रहरी पुचलं विप्लव पुचःया कार्यकर्तायात गोलीं कयेकूगु खः । प्रहरीया गोलीं कयाः नीरकुमार सीगु खः । विप्लव पुचःया छम्ह मेम्ह कार्यकर्तायात नं गोलीं कःगु धाःसां नं उकिया पुष्टि धाःसा मजूनि ।

प्रहरी जवान राई लिसें दुम्ह प्रहरी जवान सोम भट्टराईयात भोजपुर अस्पतालय् वासः याकातःगु दु । स्थानीय वासिन्दाया कथं प्रहरी जवान राईं विप्लव पुचः बारे आपालं सुचं मुंकाच्वंम्ह जूगुलिं राईयात आक्रमण याःगु खः । घटना लिपा भोजपुर सदरमुकामय् सुरक्षा व्यवस्था कडा याःगु दुसा स्थानीय जनताया दथुइ त्रास ब्वलंगु दु ।

सम्बन्धित बुखँ

LEAVE YOUR COMMENTS