बेश्यातय् निंतिं अभिशाप विश्वकप

विश्वकप फुटबलया इलय् न्ह्याबलें थें चर्चाय् वयाच्वनीगु छता खँ खः यौन । कासा, कासामि, कासामिया कलाः वा मतिनामि, प्रशिक्षक, टीमया प्रदर्शन नापनापं विश्वकपया इलय् यौनया खँ नं उतिकं चर्चाय् वयाच्वनीगु याः । थ्व झ्वलय् रसिया विश्वकप–२०१८ नं थुकिया चर्चापाखें तापाक च्वने फुगु मदु ।

विश्वकप फुटबलया इलय् आयोजक राष्ट्रया आर्थिक उन्नति ला जुइगु हे जुल लिसेलिसें आयोजक राष्ट्रया बेश्यातय् निंतिं नं छगू अवसर खः आर्थिक उन्नतिया ! प्रत्यक्ष रुपं रंगशालाय् उपस्थिति जुयाः विश्वकपया आनन्द कायेत वइपिं समर्थक वा फुटबलप्रेमीत थज्याःगु इलय् यौनया आनन्द कायेत स्वयाच्वनीसा बेश्यात नं मेमेगु इलय् स्वयां थज्याःगु इलय् थःपिनिग आम्दानी अप्वइगु म्हगस खंकाच्वनी ।

तर रसिया विश्वकप बेश्यातय् निंतिं छगूकथंया अभिसाप जुया बिउगु दु । रुसय् जारी विश्वकपया इलय् कासा जुयाच्वंगु आपालं सहरया गुलिखे रसियन बेश्यात उगु थासं स्थानान्तरण जुइत बाध्य जूगु दु । विश्वकप फुटबलया इलय् तःधंगु कारोबार जुइगु आशा यानाच्वंपिं रसियन बेश्यात थुगु इलय् प्रहरीया ख्याच्वःया कारणं सहर त्वःता पिहां वनेत तकं बाध्य जुयाच्वंगु दु ।

यद्यपि सहर त्वःता मवंपिं बेश्यातय् निंतिं नं सुखद धाःसा जुयाच्वंगु मदु । गुलिखे रसियन बेश्यातय्सं विश्वकपया मज्जा कायेत वःपिं हाकुगु जातिया पर्यटकलिसें ‘सेक्स’ यायेत स्वीकार यानाच्वंगु मदु । अफ्रिकी मूल पर्यटकलिसेया यौन सम्पर्कं सन्तान जन्म जुइबलय् विविध मिश्रित जुइगु ग्याःचिकुया कारणं इमिसं हाकुगु जातिया पर्यटकलिसें यौन सम्पर्कतयेत अस्वीकार याना वयाच्वंगु मस्कोया छम्ह कानुनविद्या धापू दु ।

गुलिखे रसियन मिसातय्सं विदेशीलिसें वैवाहिक सम्बन्ध कायम याःसां लिपा वनाः खराब स्थिति ब्वलनीगु व सम्बन्ध तकं त्वाःदलीगु कारणं नं इमिसं विश्वकप स्वयेत वयाच्वंपिं पर्यटकलिसें सम्बन्ध तयेत इच्छा व्यक्त यानाच्वंगु मदु । रुसया संसद परिवार नापं मिसा व बालबालिका समितिया प्रमुख तकं जुयाच्वंगु तमारा प्लेन्टोभाया धापू दु, ‘रसियन मिसातय्सं थः मस्त बांलाःगु स्वये चाहे जू, अले इमित थःनापं तयातयेगु इच्छा खः ।’

तत्कालीन सोभियत रुसयापालंनिसें हे रसियाया मिसातय्सं हाकुगु जातिलिसेया सम्बन्ध लिपा अश्वेत मस्त जन्म जुयाच्वंगु दु । तर इपिं न्ह्याबलें नं अवहेलनाया शिकार जुयाच्वनेमाःगलिं यानाः रसियाया बेश्यातयसं हाकुगु जाति नाप सम्भोग यायेगु इच्छा यानाच्वंगु मदु । दक्षिण अमेरिका, अफ्रिका व युरोपया हे गुलिखे हाकुगु जातियापिंलिसे इपिं चा छ्यायेत तयार मजूगुया छता हे जक कारण धइगु लिपा वनाः थः मस्तय्सं अवहेलना जुइ म्वाःलेमा धकाः खः ।