ने. सं. ११४६ बछलागा तृतीया -

सानेपा काण्डया अनुसन्धान सिधल

येँ – सानेपाय् पुलांम्ह सचिव अर्जुन कार्कीया जहान मुना कार्कीया हत्यायात कयाः प्रहरीं यानाच्वंगु अनुसन्धान क्वचाःगु खँ धाःगु दु । तर प्रहरीं थ्व घटनाय् उकुन्हुनिसें छु खँ वयाच्वंगु खः, स्वयां अप्वः छुं मलूगु खँ नं धाःगु दु ।

प्रहरीं मय्जु कार्कीयात अन हे ज्या याइम्ह विजय चौधरीं स्याःगु व स्यायेधुंकाः आत्महत्या याःगु धकाः न्हापा धाःगु खःसा आः नं थःपिं वहे निष्कर्षय् थ्यंगु खँ कंगु दु । तर स्याःगुया कारण धाःसा प्रहरीं पत्ता लगे याये मफु ।

स्यायेधुंकाः वा स्याये न्ह्यः मय्जु कार्कीयात चौधरीं बलात्कार याःगु धकाः जुयाच्वंगु अनुमान धाःसा पुष्टि मजूगु खँ नं धाःगु दु । प्रहरीं आः थ्व प्रकरणयात थुलिं हे क्वचायेकाः प्रतिवेदन तयार यायेत्यंगु दु । थुकी सीपिं निम्हेसियां अन्त्येष्टि नं क्वचायेधुंकूगु दु ।