ने. सं. ११४४ ञलागा पारू -

नुवाकोटया भैरवी द्यःया द्यःपाःलाः (धामी)या वसः हिल

नुवाकोट (रासस)- नुवाकोटया भैरवी द्यःया द्यःपाःलाः (धामी)या वसः हिलेगु ज्या म्हिगः बिहीवाः विधिपूर्वक हिउगु दु । द्यःपाःलाःया वसः झिंनिदँ छक्वः विधिपूर्वक हिलेगु परम्परा कथं थुगुसी वसः हिलेगु ज्या जूगु खः । द्यःपाःलाःया वसः हिलेगु निंतिं माःगु वसः राष्ट्रप्रमुखपाखें बीमाःगु चलन दु । थ्व हे चलन कथं वंगु माघ १३ गते धामी सहित छगू पुचः वयाः राष्ट्रपतिया अनुमति कयाः निवृत्तिभरण व्यवस्था कार्यालयपाखें न्हूगु वसः कयायंकूगु खः ।

थौंकन्हय् नुवाकोटया भैरवी द्यःया द्यःपालाः ७८ दँया हरिमानसिंह डंगोल जुयाच्वनादीगु दु । वय्कःया नुवाकोटया धामी खलःया झिंनिगूगु पुस्ता खः । थनया भैरवी द्यःया द्यःपालाः नेवाःत हे जुइ ।

द्यःपाःलाःयात भैरवी द्यः न्ह्यःने गुभाजुपिं रत्नराज वज्राचार्य व मुसुनरत्न वज्राचार्यं विधिपूर्वक पुजा यानाः न्हूगु धामी वसः पुंकूगु खः । नुवाकोटय् दँय्दसं जुइगु सिन्दुर जात्रा व जालपादेवीया मेलाया इलय् द्यःपाःलाः नं धामी वसः व तिसा पुनेगु याइ । थन दँय्दसं चैतपुन्हि कुन्हु सिन्दुर जात्रा जुइ ।

आः धामी जुयाच्वनादीम्ह हरिमानसिंह डंगोलं दकलय् न्हापां वि.सं. २०१९ य् धामी वसः हिलादिइगु खःसा थ्व धुंकाः २०३१, २०४१, २०५२, २०६३ सालय् वसः हिलादीगु खः ।

राष्ट्रप्रमुखया अनुमति मकासे थनया धामी त्रिशुली,तादी, लिखुव सामरी खुसि पुलाः वने मदु धाइ । वसः हिलेबलय् जक राष्ट्रप्रमुखया अनुमति कयाः धामी खुसि छिनाः येँय् वयेगु याइ ।

नुवाकोटय् मल्लकालं निसें थज्याःगु परम्परा न्ह्याना वयाच्वंगु विश्वास दु ।