तुयूम्ह सल ब्वाकाः मोहनि क्वचाल

ख्वप – दँय्दसं कउलाथ्व दशमीया न्हिं कुन्हु ख्वपया तलेजु द्यःया तुयुम्ह सल ब्वाकेगु ज्या चान्हय् न्ह्याकाः एकादशिकुन्हु सुथय् क्वचाःगु दु । दशमीया बहनी तलेजुया प्यम्ह मूल नाइके आचाजु, जो शी व राजोपाध्यायपाखें तान्त्रिक विधि कथं कालरात्रि पूजा,टीका साइत पूजा व विसर्जन पूजा क्वचायेकाः चान्हय् उगु सल ब्वाकीगु जात्रा जूगु खँ तलेजुया मूल नाइके नरेन्द्रप्रसाद जोशीं नेपालभाषा टाइम्सयात कनादिल । जात्रा न्ह्याये न्ह्यः फै बलि बियाः सल जात्रा कथं ख्वप देय् चाःहीकेगु याइ । थ्वया लिपा पायाः जात्रा याःगु खः । थुगुसी पायाः क्वःनेपाखें न्ह्याःगु खः ।

सकसियां मोहनिया दशमिकुन्हु चालं हनीगु खःसा येँया असं त्वालय् च्वंपिनि धाःसा एकादशि कुन्हु जक असं चालं हन । वकुन्हु न्हिनय् २ ताः इलय् असं बाकुननीं असंया उराय् समुदायया पायाः पिकायेगु ज्या जूगु खः । पायाः पिकाइबलय् दक्कले क्वकालिम्ह उराय् मचायात नायः माने यायेगु याइ ।

मोहनिया दशमी कुन्हु येँया नं थीथी त्वालय् पायाः पिहां वःगु खः । अथे हे थ्वकुन्हु यलय् नं पायाः पिहां वःगु खः । मोहनिबलय् पायाः पिकायेगु नं नेवाःतय्सं न्यायेकीगु मोहनि पर्वया विशेष अंग खः । बडा दशैं न्यायेकीपिनि पायाः पिकायेगु चलन मदु ।