सांस्कृतिक पर्व येँयाः

नेपाःया राजधानी स्वनिगः सांस्कृतिक विविधतां जाःगु सहर खः । स्वनिगःया स्वंगुलिं सहरया थःथःगु हे मौलिकता व विविधतां जाःगु जात्रा, पर्व, संस्कृति दु । ख्वपय् बिस्काः जात्राया थःगु हे महत्व दुसा यलय् विश्वय् दकलय् ताःहाकःगु जात्राकथं कयातःगु बुंगद्यःया खः सालेगु जात्राया नं बिस्कं महत्व दु ।

थुकथं हे स्वनिगःया मेगु सहर येँय् दकलय् बिस्कं महत्वं जाःगु व तःजिगु जात्रा व पर्व खः येँयाः । थ्व येँया नखः मात्र जात्रा व पर्वया रुपय् जक सीमित मजुसे आः वयाः सांस्कृतिक पर्वया रुपय् नं विकास जुजुं वनाच्वंगु दु । येँयाःया इलय् नेवाः जातिया थीथी समुदायं विशेष सांस्कृतिक महत्व बियाः थःथःगु हे कथं थ्व नखः हनेगु याना वयाच्वंगु दु ।

थनिं प्यन्हु न्ह्यः वंगु यंलाथ्व द्वादशि, शुक्रवाःकुन्हु हनुमानध्वाखाय् ३२ कू ताःहाकःगु यःसिं थनेवं छवाःयंकंया येँयाः नखः शुरु जूगु खः । यःसिंया च्वकाय् भैलःद्यःया रुपय् पुजा यायेगु याइसा क्वय्पाखे लुँयाम्ह ऐरावत किसिइ विराजमान जुयाच्वंम्ह इन्द्रया प्रतिमा तयाः पुजा यायेगु याइ ।

साइतकथं यःसिं थनीगु इलय् नेपाली सेनाया सैनिक ब्यान्ड, गुरुजुया पल्टन, पंचेबाजा, क्वचाखिं लगायतया सांस्कृतिक बाजनं मंगलधुन थायेगु याइ । यःसिं थनीगु इलय् तलेजु भवानीया प्रतिनिधित्व जुइकथं तुयुम्ह सल व राजदण्ड नं न्ह्यःने हइ । यःसिं थनेवं उकिया प्यखेरं अष्ट मातृकाया प्रतीककथं च्यागः चिचिग्वःगु यःसिं थनी ।

छवाःयंकं न्ह्याइगु येँयाःया न्हापांगु दिंकुन्हु उपाकू वनेगु चलन दु । दछियंकंया दुने मदुपिं थःछेँजःपिनिगु लमुन्तिइ उपाकू वनीगु खः । थ्व उपाकू वनीगु लँपु खड्ग आकारया खः धइगु धापू दु । उपाकू वनेबलय् गुलिसिनं पाल्चा तयाः वनीसा गुलिं धाःसा धुं, धुपाँय् जक च्याकाः चाःहिली । येँयाः शुरु जूगु प्यन्हुया दिं यंलाथ्व चतुर्दशिकुन्हु श्रीकुमारि, श्रीगणेश व श्रीभैरवया द्यःखः क्वःने साली ।

वयां कन्हय्कन्हु यंलाथ्व पुन्हि (येँयाःपुन्हि)कुन्हु श्रीकुमारि, श्रीगणेश व श्रीभैरवया द्यःखः थःनेपाखे साली । क्वःनेपाखे द्यःखः सालीकुन्हु बसन्तपुलिं द्यः सालाः हाकनं अन हे थ्यंकाः याः न्यायेकी । द्यः याः न्यायेवं दागिं पित हइ । दागिं पिहां वयाः दकलय् न्हापां थःने लागापाखे वनी । थःने वनाः बाचाः पुलाः (मरु नासःद्यः पुलाः) क्वःनेपाखे न्ह्याः वनकि बौमत यंकी ।

स्वर्गया जुजु इन्द्रया मांया वसुन्धराया धलं दनेत पालिजाः स्वांया आवश्यक जूगु व उगु स्वां कायेत जुजु इन्द्र मनूया भेषय् भौक्यब (थौंकन्हय् शान्ति निकुञ्ज स्कुल) य् सुनानं मखंक स्वां काः वंगु इलय् वयात खुँ धकाः द्वपं बियाः सकसितं क्यनेकथं चिनातःगु व लिपा इन्द्रया मां थः काययात त्वतकेत वःगु इलय् स्थानीवासीतय्सं थः दिवंगत पितृयात नं नापं स्वर्ग यंकेगु खःसा जक त्वःता बी धकाः कबुल ल्हाकाः इन्द्रयात त्वःता बिउगु धइगु किम्वदन्ती दु ।

दागिं नापं वनीपिं सकलें यकिं दह वनेमाः । यकिं दह वनाः म्वःल्हुयाः वा ख्वाः सिला वयाः बौमत स्वयाः जक छेँय् लिहां वनेमाः धइगु मान्यता दु । तर थौंकन्हय् दागिं नाप वनीपिं म्हो हे जक यकिं दह वनेगु याः । द्यःखः क्वःने सालीकुन्हु राष्ट्र प्रमुख, सरकार प्रमुख, नेपाल सरकारया उच्च पदस्थ अधिकारीलिसें नेपाःस्थित विदेशी कूटनीतिज्ञपिं बसन्तपुलिइ च्वंगु गद्दी बैठकय् च्वनाः श्रीकुमारि, श्रीगणेश व श्रीभैरवया दर्शन याइगु चलन दु ।

येँयाःया दकलय् लिपांगु न्हि नानिचा याः धकाः बसन्तपुलिं द्यःखः सालाः थःनेया हे लँपु यतखा, न्यत, किलागः, भ्याःचाद्यः, वंघः, मखं, हनुमानध्वाखा जुयाः बसन्तपुलिइ थ्यंकाः याः न्यायेकी । थ्व कुन्हु द्यः याः न्यातकि येँयाः क्वचाइ । द्यः याः न्यात कि येँयाः क्वचाइ धाःसां उकुन्हु हे बहनि यंलाथ्व द्वादशिकुन्हु थंगु यःसिं नं क्वःथइ । यःसिं क्वःथलकि विधिवत रुपं छवाःयंकंया येँयाः क्वचाःगु भाःपी । थुकथं क्वःथःगु यःसिं टेकु दोभानय् यंकाः वाये यंंकी ।

येँयाःया निंतिं यःसिं हयेगु निसें कयाः यःसिं थनेगु व क्वःथयेगु ज्या दक्वं साय्मितय्सं याइगु खः । येँयाःया निंतिं यःसिं काः वनेगु निसें यःसिं पालेगु, हयेगु, नगर प्रवेश यायेगु, थनेगु व क्वःथयेगु सकतां ज्या साइतकथं यायेमाः । येँयाःया निंतिं माःगु यःसिं नालाया यःसिं गुं हइगु खः । ख्वपया बिस्काःया निंतिं यःसिं थनेत नं थ्व हे गुँइ वनाः यःसिं काः वनी ।

यःसिं थने धुंकाः उकिं हलिंपताः ब्वयेकी । यःसिं थनाः शुरु जुइगु येँयाःया झ्वलय् मजिपाः लाखे, हल्चोकया आकाश भैरव, ख्वपया महाकाली प्याखं, किलागःया दी प्याखं व पुलुकिसि प्याखं नं पित हइ ।

सम्बन्धित बुखँ

LEAVE YOUR COMMENTS