चिभाः व चैत्य संरक्षणय् चिउताः
येँ – स्वनिगःया थीथी थासय् च्वंगु चीभाः व चैत्य संरक्षणया निंतिं अन्तर्राष्ट्रिय जगतं हे चिउताः प्वंकूगु दु । स्वनिगः दुनेया थीथी बहाः, बही, लँपु, स्मारक व सम्पदास्थलय् च्वंगु चीभाः व चैत्यत विश्वय् हे नेवाः संस्कृतिया ज्वः मदुगु नमूना जूगु धासें उकिया प्रचार प्रसार नं यायेगु ल्याखं उकथं चिउताः प्वंकूगु खः ।
अमेरिकाया न्यूयोर्क सहरय् च्वंगु वल्र्ड मोनुमेन्ट फन्डं पिथंगु ‘वाच–२०२०’ नांया धलखय् विशेष महत्व बियाः उकथंया चिउताः प्वंकूगु खः । वल्र्ड मोनुमेन्ट फन्डं प्रत्येक निदँय् छक्वः उकथं विश्वन्यंकंया संरक्षण याना तयेमाःगु स्मारकया धलः पिथनेगु याना वयाच्वंगु दु ।
थुगुसी नं फन्डया विश्वन्यंकंया थीथी निसः व न्यय्गुलिं मल्याक महत्वपूर्ण स्मारकस्थलया संरक्षण यायेमाःगु आवश्यक जूगु तायेकाः छगू धलः प्रस्तावित याःगु खःसा उकियात सम्पदाविद्तय् छगू निर्णायक पुचलं नीन्यागू सम्पदा व स्मारकस्थलया विशेष संरक्षण यायेमाःगु आवश्यकता महसुस यासें ‘वाच–२०२०’ नांया धलः पिथंगु खः ।
नेपालय् विशेषतः स्वनिगः दुने च्वंगु अज्याःगु चीभाः व चैत्यया संरक्षण यायेगु निंतिं सक्रिय रुपं अभियान न्ह्याका वयाच्वंगु ‘चीभाः–चैत्य अर्गनाइजेसन’या छम्ह दुजःलिसें अभियन्ता अमर तुलाधरं फन्डं पिथंगु ‘वाच–२०२०’ धलखय् २२ गू देयया स्मारकत दुथ्याकातःगुली स्वनिगःया चैत्य व चीभाःया नं संरक्षण याना तयेमाःगु अतिकं महत्वपूर्ण स्मारकया धलखय् दुथ्याकातःगु जानकारी बियादिल ।
उगु धलखय् विश्वन्यंकं अप्वया वनाच्वंगु शहरीकरणया कारणं चीभाः–चैत्य थेंज्याःगु महत्वपूर्ण स्मारकत संरक्षण यायेत थाकुया वनाच्वंगु अर्गनाइजेसनं न्ह्यथंगु दु । उगु धलखय् छुं दिं न्ह्यः जक मिं नयाः आपालं क्षति जूगु फ्रान्सया राजधानी पेरिसय् च्वंगु ‘नोटे« डाम’ व पेरुइ च्वंगु ‘इन्का’ थेंज्याःगु महत्वपूर्ण स्मारकया नं संरक्षण यायेमाःगु खँ न्ह्यथनातःगु जानकारी अर्गनाइजेसनं बिउगु दु ।
अभियन्ता तुलाधरं कनादीकथं पेरिस व पेरुया थें छगू जक थासय् च्वंगु स्मारक जूसा उकिया संरक्षण यायेत अःपुइगु खः, तर स्वनिगलय् न्यंकभनं हे चीभाः व चैत्य दुगुलिं उकियात संरक्षण यायेत हाथ्या वयाच्वंगु दु ।
चीभाः चैत्यया हे संरक्षणया अभियानय् न्ह्यचिलाच्वनादीम्ह मेम्ह अभियन्ता प्रविण शाक्यं विश्वविख्यात अन्तर्राष्ट्रिय संस्थां उकथं झीगु देय्या चीभाः व चैत्य संरक्षणया निंतिं गुगु चिउताः प्वंकल व धाथें हे स्वागत योग्य जूगु जक मखुसें पेरिसया नोटे« डाम व पेरुया इन्कातय्गु माचा पुचु थेंज्याःगु विश्वविख्यात स्मारकया धलखय् ज्वलिंज्वः महत्व बियाः थाय् बिउगु धइगु झीगु निंतिं नं गौरवया खँ खः धयादिल ।
चीभाः–चैत्य अर्गनाइजेसनपाखें थःपिंसं गुगु ज्या याना वयाच्वनागु खः फन्डया प्रतिवेदनं थःपिनिगु ज्यायात अझ हौसला बिउगु अभियन्ता शाक्यं धयादिल । वय्कलं धयादिल, ‘फन्डया ‘वाच–२०२०’ प्रतिवेदनं यानाः नेपाःमितय्त चीभाः–चैत्य संरक्षण यायेगु ज्याय् अझ अप्वः सजग जुइत नं प्रेरित याःगु दु ।’
‘थःपिंसं चीभाःया संरक्षण यायेगु ल्याखं सचेतना ज्याझ्वः, चीभाःया सुचुकुचु यायेगु व मर्मत तकं यायेगु ज्या न्ह्याकेत थुकथंया प्रतिवेदनं अझ अप्वः ग्वाहालि जूगु दु’ शाक्यं धयादिल, ‘जिमिसं याना वयाच्वनागु ज्याय् सकसितं हःपाः व तीबः बियादी धइगु भलसा कयाच्वना ।
अभियन्ता तुलाधरं कनादीकथं वय्कःपिनिगु संस्थापाखें वंगु खुदँ न्हय्दँ न्ह्यवंनिसें स्वनिगःया चुक, ननि, लँपु, बहाः बही आदि थासय् च्वंगु चीभाः–चैत्य संरक्षणया ज्या याना वयाच्वंगु दु ।
येँ दुनेया छथ्वः स्वयमसेवकतय्सं चीभाःया संरक्षणनापं थ्व सम्बन्धी थीथी गतिविधि न्ह्याका च्वंगु बारे जानकारी बीगु व चीभाः–चैत्य सम्बन्धी छुं नं जानकारी बीगु निंतिं फेसबुकय् जततउकस्रराबअभदययप।अयmरअजष्खबअजष्तथब संचालन याना वयाच्वंगु दु ।
अर्गनाइजेसनं बिउगु जानकारीकथं ५० दँ मल्याक पुलांगु इतिहास दुगु वल्र्ड मोनुमेन्ट फन्ड मुक्कं सम्पदा व स्मारक संरक्षणया निंतिं क्रियाशील संस्था खः ।
फन्डं बिउगु जानकारीकथं , क्ष्ऋऋच्इः, क्ष्ऋइःइक्, क्ष्ऋइः, ल्भध थ्यगच ग्लष्खभचकष्तथ थेंज्याःगु संस्थालिसे सम्बन्धित विज्ञत छनोट कमिटिइ दुथ्यानाच्वंगु दु । थुगु संस्थां सन् १९९६ निसें थुकथंया धलः पिथनेगु शुरु याःगु खःसा सम्पदा व स्मारकया संरक्षणय् विशेष चिउताः क्यने फयेमाः धकाः उकथं धलः पिथनेगु याःगु खः ।
LEAVE YOUR COMMENTS