स्वनिगःया दुनेया बस्तीइ एकीकृत आवास प्रणाली हयेगु योजना

येँ – राष्ट्रिय पुनःनिर्माण प्राधिकरणं स्वनिगः दुनेया ख्वातुगु बस्ती दुगु थासय् एकीकृत आवास प्रणाली विकासया योजना न्ह्यःने हःगु दु । प्राधिकरणलिसें येँ महानगर व यल महानगरपालिकाया प्रतिनिधि दथुइ जूगु छगू मुँज्याय् प्राधिकरणं उकथंया प्रस्ताव न्ह्यःने हःगु खः । प्राधिकरणया प्रमुख कार्यकारी अधिकृत युवराज भुसालया नेतृत्वय् च्वंगु मुँज्याय् २०७२ सालया तःभुखाय् लिपा स्वनिगःया आपालं छेँ क्षतिग्रस्त जूगु व उकिया पुनःनिर्माण जुइ मफयाच्वंगु अवस्थायात ध्यानय् तयाः जग्गा एकीकरणया प्रणालीपाखें पुनःनिर्माण यायेगु प्रस्ताव हःगु खः ।

२०७२ साल बैशाख १२ गते व वयां लिपा वःगु भुखाचं स्वनिगलय् छगू लाख स्वयां अप्वः छेँ दुंगु तथ्यांक दुसा उकी मध्ये आतक २० प्रतिशत छेँया जक पुनःनिर्माण जूगु दु । ८० प्रतिशत छेँ पुनःनिर्माण जुइ मफुगु कारण म्हो जग्गा खः । निगुलिं महानगरपालिकाया प्रमुखसहितया मुँज्याय् प्राधिकरणया प्रमुख कार्यकारी अधिकृत भुसालं मंकाःकथं एकीकृत आवास निर्माणया निंतिं छु याये फइगु धइगु बारे सहलह यानादीगु खः । बैठक थ्व सम्बन्धय् थप अध्ययन यायेत छगू कार्यदल नं गठन याःगु दु ।

प्राधिकरणया हे सहसचिव राजुमान मानन्धरया संयोजकत्वय् न्याम्हेसिया कार्यदल गठन याःगु खः । उगु कार्यदलयात स्वनिगः दुने ख्वातुगु बस्ती दुगु थासय् एकीकृत आवास निर्माणया निंतिं गुकथं अवधारणा तयार याये फइ धइगु बारे अध्ययन यानाः विस्तृत प्रतिवेदन बीत बाःछिया ई बियातःगु दु । उगु कार्यदलय् निगुलिं महानगरपालिकालिसें सहरी विकास मन्त्रालयया प्रतिनिधि दुथ्यानाच्वंगु दुसा कार्यदलयात सहरी विकास तथा भवन विभागया पुलांम्ह महानिर्देशक सूर्यभक्त सांगाछेँ नं परामर्शदाताया कथं ग्वाहालि यानादीगु जूगु दु ।