भिक्षु बोधिसेन न्हूम्ह संघनायक पदस्थापन
- नेपालभाषा टाइम्स
- ११४० गुंलाथ्व पुन्हि
- किपा-छसिकथं बाेधिसेन भन्ते व गुणघाेष भन्ते
येँ – नेपाःया च्याम्हम्ह संघनायकया रूपय् भिक्षु बोधिसेन महास्थविर पदासीन जुयाबिज्याःगु दु । थ्व स्वयां न्ह्यः वसपोल संघउपनायक जुयाबिज्याःगु खः । संघनायक भिक्षु ज्ञानपूर्णिक महास्थविर मदुगुलिं वसपोलया थासय् भिक्षु बोधिसेन महास्थविर संघनायक जुयाबिज्याःगु खः ।
अथे हे आः न्हूम्ह संघउपनायकय् रूपय् भिक्षु गुणघोष महास्थविर पदासीन जुयाबिज्याःगु दु ।
अखिल नेपाल भिक्षु महासंघया उपाध्यक्षपिं भिक्षु सुमेध महास्थविर लिसें भिक्षु धर्ममूर्ति महास्थविरया उपस्थितिइ भिक्षु महासंघया धर्मानुशासक, पदाधिकारी व सम्बद्ध संघ दुजःपिनि दथुइ थौं ने.सं. ११४० गुंपुन्हि (श्रावण १९ गते, बु.सं. २५६४) सोमवाः कुन्हु च्वंगु मुँज्यां वसपोलपिंत संघनायक व उपसंघनायकय् पदासीन यायेगु थुगु निर्णय याःगु खः । मुँज्या स्वयम्भूस्थित ऐतिहासिक आनन्दकुटी विहारया सीमागृहय् च्वंगु खः ।
मुँज्यापाखें महासंघया धर्मानुशासक, पुलांम्ह नायः, बोधिचर्या विहार (बनेपा) या संस्थापक प्रमुख महासद्धम्मजोतिकधज भिक्षु बोधिसेन महास्थविरलाई संघनायक पतिट्ठापनविधिसहित संघसम्मति विधिपूर्वक नेपाःया च्याम्हम्ह संघनायक पदय् धर्मगौरवसहित पदस्थापन याःगु खः ।
उकथं हे महासंघया धर्मानुशासक, पूर्वाराम विहार (धौख्यः) या संस्थापक प्रमुख महासद्धम्मजोतिकधज भिक्षु गुणघोष महास्थविरयात संघउपनायक पतिट्ठापनविधिसहित संघसम्मति विधिपूर्वक संघउपनायक पदय् धर्मगौरवसहित पदस्थापन याःगु खः ।
मुँज्याय् संघसदस्य भिक्षुपिनि संघकार्य दथुइ कम्मवाचाकारक भिक्षु धर्मशोभन महास्थविर व भिक्षु शीलभद्र महास्थविरं कम्मवाचा वाचन यानाबिज्याःगु खः ।
संघउपोसथ कर्मसहित वर्षावासया प्रारम्भ नापनापं संघनायक प्रतिस्थापन सम्पन्न यायेगु ज्याय् स्वनिगलय् उपसम्पदा प्राप्त भिक्षुपिनि उपस्थिति दुगु खः ।
थौंकन्हय् कोरोना संक्रमणया कारणं अप्वः भीडभाड याये मजिउगु कारणं उपयुक्त इलय् सार्वजनिक समारोह यासें संघनायक अभिनन्दन ज्याझ्वः जुइगु जानकारी भिक्षु महासंघया महासचिव भिक्षु कोण्डन्यं बियाबिज्याःगु दु ।
LEAVE YOUR COMMENTS