किपुया विकासय् संघीय सरकारय् ध्यान वनीगु आशा
किपू- संघीय सरकारया भौतिक पूर्वाधार तथा यातायात मन्त्री वसन्त कुमार नेम्वाङं शुक्रवाः कीपू नगरपालिकाय् जुयाच्वंगु भौतिक निर्माणया निरीक्षण यानादीगु दु । मन्त्री नेम्वाङं किपू नगरपालिका व चन्द्रागिरी नगरपालिका स्वाइगु धःपा दिखु खुसिइ दयेकाच्वंगु ताँ, वडा नं. ९ या नगामय् दयेकाच्वंगु रिटेनिङ्ग वाल व धः निकासया निरीक्षण यानादीगु खः । वय्कः लिसें पुलांम्ह राज्यमन्त्री व संघीय सांसद कृष्णगोपाल श्रेष्ठ, सांसदपिं दिलिप महर्जन, वीना श्रेष्ठपिं नं झायादीगु खः ।
निरीक्षण न्ह्यः किपू नगरपालिकाय् मन्त्री नेम्वाङयात नगरपालिका प्रमुख रमेश महर्जन व उपप्रमुख सरस्वती खडकापिंसं लसकुस यानादीगु खः । नगरपालिका प्रमुख महर्जनं किपू नगरपालिका दयेकेत्यंगु स्मार्ट स्ट्रिट लाइनया अवधारणा पत्र (डिपीआर) नं मन्त्री नेम्वाङयात लःल्हानादीगु खः । थ्व झ्वलय् नगर प्रमुख महर्जनं किपू नगरया विकास आयोजनाय् संघीय व प्रदेश सरकारया ध्यान वनामच्वंगु धासें आः मन्त्री नेम्वाङया भ्रमण लिपा संघीय सरकारया विकासय् किपू नगरपालिका नं दुथ्याइगु आशा प्वंकादिल ।
मन्त्री नेम्वाङं स्मार्ट स्ट्रिट लाइटया निंतिं अत्यावश्यक अवधारणा पत्र तकं दयेकाः किपू नगरपालिका छपलाः न्ह्यःने वनेधुंकूगु खँय् प्रसंशा यानादिसें थःम्हं किपुली आवश्यक विकास निर्माणया ज्याय् ग्वाहालि यायेगु प्रतिबद्धता प्वंकादीगु खः ।
किपुली थ्यंकादीम्ह मन्त्री नेम्वाङयात किपूया दकलय् च्वय्च्वंगु ऐतिहासिक पर्यटकीय स्थल उमा महेश्वर देगः, किपूया लाय्कू लागा नं चाःहिकूगु खः । ज्याझ्वः लिपा नगरप्रमुख महर्जनं किपूया हे मिसा पुचःपाखें दयेकूगु मतिनाया चिं मन्त्री नेम्वाङयात देछायादीगु खः । समापन झ्वलय् उपप्रमुख खड्कां किपू नगरपालिकां थःगु सीमित स्रोतं विकास निर्माणया ज्या याना वयाच्वनागु धासें आः संघीय सरकारपाखें नं किपू नगरया विकासय् ध्यान बीगु भलसा कयागु खँ धयादिल ।
LEAVE YOUR COMMENTS