मल्लया उपन्यास ‘सेप्टेम्बर १७’ अंग्रेजीं पिदन
येँ (नेपालभाषा टाइम्स) – नेवाः न्ह्यलुवाः लिसें उपन्यासकार मल्ल के सुन्दरया लोकंह्वाःगु उपन्यास ‘सेप्टेम्बर १७’या अंग्रेजी संस्करण पिदंगु दु । येँ महानगरपालिकाया कार्यवाहक मेयर सुनिता डंगोलं शनिवाः छगू ज्याझ्वःया दथुइ अंग्रेजी संस्करणया पितब्वज्या यानादीगु दु ।
अमेरिकाय् थ्यंम्ह छम्ह ल्याय्म्हं थःगु म्हसीका मामां नेपाः थ्यंकःवःगु व थः नेवाः धकाः म्हसीकेधुंकाः थःगु जातीय म्हसीका कथं थनया भाय्, संस्कृति, संस्कार नालाकाःगु बाखं दुगु थुगु उपन्यास वरिष्ठ समालोचक ज्योतिप्रभा तुलाधरं अंग्रेजी अनुवाद यानादीगु खः ।
भारतया आदर्श बुक्स पाखें पिथंगु थुगु सफू पितब्वज्या यानादिसें येँ महानगरपालिकाया कार्यवाहक मेयर सुनिता डंगोलं मल्ल के सुन्दरया बहुआयामिक व्यक्तित्वया चर्चा यानादिसें वय्कःया उपन्यास अंग्रेजी भासं अनुवाद जुया वःगु नेपालभाषा साहित्यया निंतिं छगू ऐतिहासिक उपलब्धि जूगु खँ धयादिल । नेपालभाषा, मानवअधिकार, जातीय अधिकार, साहित्य, संस्कृति ख्यलय् न्यागू दशकं मल्याक ज्या यानादीधुंकूम्ह भाजु सुन्दर थःम्हं जक मदिक्क ज्या यानादीगु मखसें ल्याय्म्ह पुस्तायात नं प्रेरित यानाच्वंगु खँ धयादिसें वय्कलं थः थेंज्याःपिं ल्याय्म्हतय्त नं मल्ल के सुन्दरं न्ह्यःने न्ह्याः वनेत तःधंगु मार्गदर्शन यानाच्वंगु खँ धयादिल ।
ज्याझ्वलय् वरिष्ठ समालोचक अभि सुवेदीं उपन्यासकार मल्लं उपन्यासया पात्र, ई, बाखंयात तसकं न्ह्यइपुसे च्वंगु संयोजन यानातःगु धयादिसें थःगु म्हसीका माःवःम्हं पात्रयात सुरुं निसें सशक्त रुपं न्ह्यब्वयातःगु खँ धयादिल ।
थौंकन्हय् पोर्चुगलय् च्वंच्वनादीम्ह अनुवादक डा. तुलाधरं ज्याझ्वलय् छगू भिडियो सन्देश छ्वयाहयादिसें थःत उपन्यासया विषयवस्तुं सालाकाःगुलिं हे थःम्हं उपन्यास अनुवाद यानागु खँ धयादिल । अथेहे नेपालभाषा एकेदेमिया भाइस चान्स्लर डा. पुष्पराज राजकर्णिकारं अंग्रेजी अनुवाद पिदंगुलिं च्वमियात भिंतुना देछासें उपन्यासया बाखंयात कुलादीगु खः । प्रकाशक आदर्श बुक्सया कार्यकारि प्रमुख निर्मलकुमार कर्णं लसकुस यानादीगु ज्याझ्वलय् उपन्यासकार मल्ल के सुन्दरं सफू पिथनेत ग्वाहालि यानादीपिंत सुभाय् देछायादीगु खः ।
LEAVE YOUR COMMENTS