क्षमता स्वयां अप्वः यात्रु तयाः चले याःगु सवारी साधनयात कारवाही

येँ – महानगरीय ट्रापिक प्रहरी महाशाखां क्षमता स्वयां अप्वः यात्रु तयाः चले याःगु सवारी साधनयात कारवाही याःगु दु । महाशाखां सवारी साधनया सीट क्षमता स्वयां अप्वः यात्रु तयाः चले याःगु १८९ सवारी साधनयात कारवाही यानागु जानकारी बिउगु दु ।

महाशाखाया सहप्रवक्ता मुकुन्द मरासिनीं सफा टेम्पो व १८ सिट स्वयां म्हो क्षमताया माइक्रोबसं अप्वः यात्रु तयाः चले याःगु धासें कारवाही यानागु जानकारी बिउगु दु । कारवाहीलय् लाःगु सवारी साधनयात ५०० तका जरिवाना याःगु दु ।
गृह मन्त्रालयं सिट क्षमता स्वयां अप्वः यात्रु कुबीगु सवारी साधनयात कारवाही यायेत निर्देशन बीवं महाशाखां उकथंया कारवाही अभियान न्ह्याकूगु खः ।

सहप्रवक्ता मरासिनीं बियादीगु जानकारीकथं स्वनिगःया थीथी स्वंगू दर्जन स्वयां अप्वः थासय् चेक जाँच यायेगु झ्वलय् उकथं कारवाही याःगु खःसा कारवाहीलय् लाःगु सवारी साधनं हाकनं अज्याःगु हे गल्ती दोहारे यात धाःसा स्वद्वः तका जरिवाना याइगु जूगु दु ।

वंगु बुधवाः गृहमन्त्री रामबहादुर थापां मन्त्रालयय् सरोकारवालालिसें जूगु बैठक लिपा दुर्घटना न्यूनीकरण व ट्राफिक नियम पालनाया निंतिं धासें उकथं कारवाही यायेत ट्राफिक प्रहरीयात निर्देशन बियादीगु खः । थुकथं हे महाशाखां मिटरं धाःगु थासय् वनेत माने मजुइपिं ट्याक्सी व मिटरय् प्रिन्टर जडान मयाःपिंत नं कारवाही याःगु दु ।