ने. सं. ११४६ दिल्लाथ्व षष्ठी -

१६ दँ लिपा विश्वकप फुटबलया उपाधि स्पेनयात

फिफा विश्वकप फुटबलया उपाधि स्पेनं त्याकूगु दु । २३ क्वःगु संस्करणया विश्वकप उपाधिया निंतिं जूगु फाइनलय् स्पेनं साविकया विजेता अर्जेन्टिनायात १-० गोलं बुकाः उपाधि त्याकूगु खः । स्पेनं १६ दँ लिपा विश्वकपया उपाधि त्याकूगु खः ।

अमेरिकाया न्यूयोर्कस्थित न्यूजर्सी रंगशामलाय् जूगु कासाय् स्पेनया निंतिं छगू जक निर्णायक गोल फेरान टोरेसं याःगु खः । टोरेसं अतिरिक्त ईया १०६ औं मिनेटय् स्पेनया निंतिं विजयी गोल याःगु खः । निर्धारित ९० मिनेटया कासा गोलरहित बराबरीइ क्वचायेवं कासा अतिरिक्त ईपाखे वंगु खः । कासाज्वःछि हे स्पेनं अर्जेन्टिनायात दबावय् तयातःगु खः ।

कासाय ९०+४ मिनेटय् स्पेनया डिफेन्डर पाउ कुबार्सीयात फल याःगुलिं अर्जेन्टिनाया एन्जो फर्नान्डिजयात रेड कार्ड क्यंगु खः । फर्नान्डिजयात ११ मिनेट न्ह्यः जक न्हापांगु यल्लो कार्ड क्यंगु खः । ल्यं दनिगु स्टपेज टाइम व अतिरिक्त ईलय् अर्जेन्टिनाया १० म्ह कासामिं जक म्हितुगु खः ।

रेर्ड कार्ड लिपा स्पनें संख्यात्मक श्रेष्ठताया फाइदा काःगु खःसा अतिरिक्त इलय् टोरेसं निर्णाण्क गोल याःगु खः । अथेहे कासा लिपा ल्वापुइ संलग्न जूगुलिं अर्जेन्टिनाया लिआन्ड्रो पारेडेसयात अन्तिम सिटी निगूगु रेड कार्ड क्यंगु खः ।

सन् २०१० य् स्पेनं न्हापांखुसी विश्वकप उपाधि त्याकूगु खः । १६ दँ लिपा विश्वकपया फाइनलय् थ्यंगु स्पेनं निक्वःखुसी विश्वकप उपाधि त्याकेत ताःलाःगु दु । स्पेनं विश्वकप उपाधिलिसें कीर्तिमान नं तःगु दु । समूह चरणनिसें नकआउट चरणय् च्यागू कासा म्हितेगु झ्वलय् स्पेनं छगू हे जक गोल नःगु दु । विश्वकपया इतिहासय् गुगुं नं विजेता टोलीं दकलय् म्हो गोल नयाः उपाधि त्याकाः स्पेनं कीर्तिमान तःगु खः ।

स्पेन लिपांगु ३८ गू कासाय् अपराजित दु । २९ गू कासा त्याकूगु स्पेनं गुंगू कासा बराबरीइ म्हितूगु दु । थ्व गुगुं नं युरोपेली टोलीं दयेकूगु आतकया दकलय् ताःहाकःगु अपराजित यात्रा खः । थ्व स्वयां न्ह्यः थुकथंया कीर्तिमान इटालीया नामय् दुगु खः । इटालीं सन् २०१८ निसें २०२१ तक ३७ गू कासा म्हितेगु झ्वलय् २८ गू कासाय् विजय व गुंगू कासा बराबरी म्हितूगु खः ।

स्पेनलिसे बुइवं सन् २०२२ य् विश्वकप त्याकूगु अर्जेन्टिनाया लगातार निक्वः विश्वकप ल्ह्वनेगु ह्वःताः छखे लाःगु दु ।

फिफा विश्वकप २०२६या विजेतां विश्वकप ट्रफीलिसें थुगुसी ‘च्याम्पियनसिप अंगू’ नं प्राप्त याःगु दु । फिफां विश्वकप विजेतायात थुगुसी विशेषकथं डिजाइन यानातःगु ‘च्याम्पियनसिप अंगू’ नं बिउगु खः । अंगूया छखे विश्वकप ट्रफी कियातःगु दुसा मेखे उपाधि विजेता टोलीया म्हसीका पिज्वइकथं परिमार्जन यानातःगु दु । विश्वकप फुटबलया इतिहासय् न्हापांखुसी ‘फिफा विश्वकप फुटबल २०२६’ या सम्मानकथं ट्रफीलिसें विजेता टोलीयात विशेषकथं तयार यानातःगु उगु अंगू नं प्रदान याःगु खः ।

रोड्रीयात ‘गोल्डेन बल’ एम्बाप्पेयात ‘गोल्डेन बुट’
विश्वकप उपाधि त्याकूगु स्पेनं व्यक्तिगत अवार्डय् नं बर्चस्व कायम याःगु दु । स्पेनयात १६ दँ लिपा विश्वकप त्याकेत नेतृत्वदायी भूमिका म्हितूम्ह कप्तान रोड्रीं ‘गोल्डेन बल’ त्याकूगु दु । कासाज्वःछि उत्कृष्ट व प्रभावशाली प्रदर्शन याःम्ह रोड्री प्लेयर अफ द टुर्नामेन्ट जुयाः ‘एडिडास गोल्डेन बल’ त्याकूगु खः । रोड्रीं अर्जेन्टिनाया कप्तान लियोनल मेस्सी व फ्रान्स कप्तान किलिएन एम्बाप्पेयात लिउने लाकाः उगु अवार्ड त्याकूगु खः ।
अथे हे स्पेनया १९ दँ दुम्ह रक्षापंक्तिया कासामि पाउ कुबार्सीं ‘उत्कृष्ट ल्याय्म्ह कासामि’या अवार्ड त्याकेत ताःलाःगु दुसा उत्कृष्ट गोलरक्षक जुयाः ‘गोल्डेन ग्लोभ्स’या अवार्ड नं स्पेनया उनाई सिमोनं प्राप्त याःगु दु । स्पेनं म्हितूगु च्यागू कासामध्ये न्हय्गू कासातक गोल मनसे क्लिनसिट तयाः न्हूगु कीर्तिमान नं तःगु खः । सिमोन विश्वकपय् ६०० मिनेट स्वयां अप्वः ई गोल मनसे कीर्तिमान तःगु खः ।

अर्जेन्टिनाया कप्तान मेस्सीं ‘सिल्भर बल’ व ‘सिल्भर बुट’ प्राप्त याःगु दुसा विश्वकप उपाधि त्याके मफुसां कासा ज्वःछि दकलय् अप्वः १० गू गोल याःम्ह फ्रान्सया कप्तान एम्बाप्पें ‘गोल्डेन बुट’ व ‘ब्रोन्ज बल’ प्राप्त याःगु दु । एम्बाप्पे लगातार निक्वःतक गोल्डेन बुट त्याकूम्ह न्हापांम्ह कासामिलिसें विश्वकपय् दकलय् अप्वः गोल यायेत ताःलाःम्ह कीर्तिमानी कासामि नं जुइत ताःलाःगु दु । फ्रान्सयात बुकाः स्वंगूगु थासय् वःगु इंग्ल्याण्डया जुड बेलिंघमं ‘ब्रोन्ज बुट’ अवार्ड त्याकल ।