स्वनिगलय् नं डेंगु न्यंकीपिं पत्ति लुल

येँ – स्वनिगलय् नं डेंगु सरे याइपिं पत्ति लुइवं सरकारं सतर्क जुइत इनाप याःगु दु । येँय् जूगु अध्ययनय् डेंगु न्यंकीपिं एइडिज एइजेप्ती पत्ति लुइवं स्वास्थ्य मन्त्रालयया इपिडिमियोलोजी तथा रोग नियन्त्रण महाशाखां सतर्क जुइत इनाप याःगु खः । महाशाखाया कथं ल्वय् न्यंकीपिं पत्ति लुइवं ल्वचं कयाः समस्याय् लायेगु स्वयां न्हापा हे सतर्क जुइमाः धासें अलर्ट जुइगु इनाप याःगु दु ।

न्हापा हे ध्यान मबिउगु कारणं यानाः थीथी जिल्लाय् समस्या वःगुलिं स्वनिगलय् पत्तिपाखें बचे जुइत इनाप यानागु खँ नं महाशाखां धाःगु दु । महाशाखाया कथं स्वनिगलय् आः तक सुयातं नं ल्वचं कःगु मदुनिसां वा वयेगु मौसम शुरु जूगुलिं डेंगु न्यना वनेफइगु खँ धाःगु दु । स्वनिगलं स्वंगुलिं जिल्ला खतराय् दुसां नं येँया बनस्थली क्षेत्र अप्वः खतराय् दुगु खँ महाशाखां धाःगु दु ।

अध्ययनया झ्वलय् डेंगु न्यंकीपिं पत्ति आपालं लूगुलिं सतर्क जुइत इनाप याःगु खः । वंगु दँय् येँया सानो भ¥याङय् झिंच्याम्हेसित डेंगु ल्वचं कःगु खः । तसकं ज्वर वइगु, नये मयइगु, म्ह गले जुइगु, कै वइगु आदि डेंगुया लक्षण खः । डेंगु पत्तिपाखें न्यनावनीगु ल्वय् जूगुलिं पत्तिं न्याइगुपाखें बचे जुइमाःगु व डेंगु न्यंकीम्ह पत्तिं न्हिनय् नं न्यायेफइगु जूगुलिं म्हछम्हं त्वपुइगु वसः पुनेत नं विज्ञपिंसं सुझाव बिउगु दु ।

डेंगु ल्वचं कयेवं वासः मजुल धाःसा मनू सी तकं फुगु खँ धाःगु दु । ज्वर वयेवं वा डेंगु जूगु शंका जुइवं स्वास्थ्य जाँच याकेमाःगु व ज्वरो कुहां वःगु ४८ घौ तक नं अवस्था जोखिमपूर्ण हे जुइगुलिं विरामीतय्त चिकित्सकतय् निगरानीइ तयेमाःगु खँ स्वास्थ्यकर्मीतय्सं धाःगु दु । वइगु कार्तिक तक नं डेंगुया खतरा दुगु खँ धाःगु दु । थ्व स्वयां न्ह्यः धरानय् डेंगुया ल्वगि लूगु खःसा वयां लिपा विराटनगरय् ल्वय् न्यनावंगु खः ।