ने. सं. ११४६ तछलाथ्व पञ्चमी - सिद्धिचरण श्रेष्ठ बुदिं

चाबहिलिइ ल्ह्यये जिउगु ताँ दयेकेगु शुरु

येँ- चाबहिलिइ छगू थासं मेगु थासय् ल्ह्यये जिउगु ताँ दयेकेगु शुरु जूगु दु । येँ महानगरपालिकां लँजुवातय् दकलय् अप्वः चाप दुगु थासय् थुकथंया ताँ दयेकेगु योजनाकथं दकलय् न्हापां चाबही चोकय् उगु ताँ दयेकेगु ज्या न्ह्याकूगु खः ।
येँ मनपाया प्रमुख विद्यासुन्दर शाक्यं ताँ निर्माणया शिलान्यास यानादीगु खः । ताँया शिलान्यास यानादिसें येँ मनपा प्रमुख शाक्यं लँजुवाःतय् सुरक्षा, ट्राफिक व्यवस्थापनय् सहजता हयेगु ल्याखं महानगरं यात्रुतय् दकलय् अप्वः चाप दइगु थासय् थुकथंया ताँ दयेका वनेगु जुइ धयादिल ।

पूर्वाधारया आवश्यकत महसुस यानाः शिलान्यास धाःसा यायेगु तर इलय् ज्या सिमधयाः उलेज्या जुइ मफइगु गुगु समस्या दयाच्वंगु खः, थज्याःगु समस्यापाखें मुक्त यायेकथं इलय् हे थुगु ताँ निर्माण सम्पन्न यानाः इलय् हे ज्या यायेफु धइगु सन्देश बीगु वय्कलं धयादिल ।

येँ मनपा ७ वडा अध्यक्ष शुद्धकुमार डंगोलं चाबही चोकय् लँजुवाःतय् चाप तसकं अप्वः दुगुलिं आकाशे ताँया तसकं अवश्यक जूगु धासें ताँ निर्माण सम्पन्न जुइधुंकाः सतक व यात्रुतय् चापयात ध्यानय् तयाः मेमेगु थासय् नं पूर्वाधान निर्माण यायां वनेगु जुइ धयादिल । थुगु ताँया निर्माणया निंतिं कान्छामान निर्माण सेवालिसे वंगु कात्तिकया लिपांगु वाःपाखे हे सम्झौता याःगु खः । आकाशे ताँया इन्जिनियर प्रेमबहादुर श्रेष्ठं बियादीगु जानकारीकथं २३ मिटर हाकः व २ मिटर ब्या दइगु ताँया निर्माण कम्पनीं ८२ गू लाख ख्वीखुद्वः लागतं याइगु जूगु दु । आवश्यक जुइगु इलय तत्काल छगू थासं मेगु थासय् ल्ह्यये फइगु थुगु ताँ सम्झौताकथं वइगु २०७७ असार २७ गते तकया दुने निर्माण सम्पन्न यायेमाःगु जुइ ।

येँ मनपां थ्व हे आर्थिक दँय् थुकथं हे यात्रुतय् अप्वः चाप दइगु मेगु निगू थाय् ग्वल (जय बागेश्वरी) व माइतीघरय् नं आकाशे ताँ निर्माण याइगु जुयाच्वंगु दु । मनपां चालु आर्थिक दँय् थुकथंया ताँ निर्माण यायेत न्यागू करोड तका दां विनियोजन याःगु दु ।