ने. सं. ११४३ तछलाथ्व त्रयोदशी -

रेमिटेन्सय् नं अमेरिका न्हाप

हुन्डी व्यवसाययात कडाई याःगुया लिच्वः

येँ – नेपालय् रेमिटेन्स छ्वया हयेगुली न्ह्याबलें खाडी मुलुक न्ह्यःने लानाच्वंगु खःसां वंगु दछि न्ह्यवंनिसें अमेरिका एक नम्बरय् लाः वयाच्वंगु दु । अमेरिका, युरोप आदि देशय् वनाच्वंपिं नेपाःमितय्सं थःगु देशय् ध्यबा छ्वया महः धकाः द्वपं बीगु याना वयाच्वंगु खःसां वंगु दछि न्ह्यवंनिसें धाःसा अमेरिका अजूचायापुक न्ह्यःने लाःवःगु दु ।

थगुने अमेरिकापाखें जक नेपालय् १ अर्ब ५२ करोड तका दां दुहां वःगु खः । थगुने साउदी अरबपाखें ८८ करोड व कतारपाखें ७७ करोड तका जक दुहां वःगु खः । अथे हे थ्वहे दँया खुलाया अवधिइ नं अमेरिका हे न्ह्यःने लानाच्वंगु दु । वंगु खुलाया दुने अमेरिकां जक ७५ करोड दां दुहां वयेधुंकूगु दुसा साउदी अरबपाखें ४० करोड व कतारपाखें ३५ करोड दुहां वःगु दु ।

थथे जूगुया कारणय् नेपाः सरकारं हुण्डी व्यवसाय याइपिं कडाई याना हःगुलिं खः धाःगु दु । नेपालय् आः हुण्डी यानाः ध्यबा छ्वये मजिउ धकाः कडाई याना हःगुलिं अमेरिकाय् च्वंपिं नेपाःमितय्सं वैध लँपुं ध्यबा छ्वया हःगुलिं थ्व ध्यबा अप्वः खने दया वःगु खः ।

लिसें थौंकन्हय् नेपालय् रेमिटेन्सया ज्या याइपिं एजेन्टतय्सं आः थःपिनि क्षेत्र विस्तार यानाः अमेरिका थ्यंक पहुँच दयेकूगु कारणं यानाः नं वैध लँपुं ध्यबा दुहां वःगु खने दुगु खँ धाःगु दु ।

वैध लँपुं ध्यबा दुहां वःगु आः अप्वः खने दुगु खःसां न्हापा अवैध रुपं नं अमेरिकां हे बिचाः यानातःगु स्वयां अप्वः दां दुहां वयाच्वंगु दावी सूत्रं याःगु दु । थौंकन्हय् खाडी लागाय् वनीपिं नेपाःमितय् ल्याः म्हो जुयाच्वंगु व खाडीया आर्थिक अवस्था नं स्यनाच्वंगु जुयाः अमेरिका न्हाप लाःगु खँ नं सूत्रं धाःगु दु ।

अष्ट्रेलियाया ग्वाहालि
अष्ट्रेलिया सरकारं अन बिचल्लीइ लाःपिं नेपाःया विद्यार्थीयात ग्वाहालि याइगु जूगु दु । अष्ट्रेलियाया शिक्षा विभागं सिड्नीया एआइबिटी कजेलया दर्ता खारेज जुयाः अन्यौलय् लानाच्वंपिं विद्यार्थीया निंतिं सुचं जारी यासें उगु खँ धाःगु खः ।
१२०० म्ह नेपाःमि विद्यार्थी ब्वनाच्वंगु एआइबिटी कलेजया दर्ता अष्ट्रेलिया सरकारं खारेज याना बिउगु खः ।

सिड्नी व ब्रिसबनय् दुगु उगु कलेजं विद्यार्थी हयेत अनैतिक ज्या याःगु धासें प्राविधिक शिक्षाया नियमन याइगु अष्ट्रेलियन क्यावालिटी अथोरिटी (आस्क्वां) दर्ता खारेज याःगु खः । आः कलेजं थुकिया विरुद्ध कानुनी मुद्दा नं ल्वायेगु तयारी यानाच्वंगु दु ।