मेयर शाक्य खोप केन्द्रया अनुगमनय्

येँ – येँ महानगरपालिकाया प्रमुख विद्यासुन्दर शाक्यं थीथी खोप केन्द्रय् झायाः अनुगमन यानादीगु दु । ६० दँ निसें ६४ दँ तकया नागरिकतय्त मंगलवाः निसें कोभिड १९ विरुद्धया चिनियाँ खोप भेरोसिल बीगु सुरु याःगु खः ।

खोप केन्द्रया अनुगमन यायेगु झ्वलय् महानगर प्रमुख शाक्यं ६० निसें ६४ दँ तकया सकसिनं खोप कयादीत इनाप यानादीगु दु । ‘काठमाडौं महानगरपालिकां ३२ गुलिं वडाय् खोप केन्द्र तःगु दु, थःत गन अःपु अन वनाः खोप कयादीत इनाप याना । खोप कायेत थःगु हे वडाय् वनेमाः धयागु मदु, न्ह्याथाय् वनाः काः वंसां जिउ’ वय्कलं धयादीगु दु ।

आः खोप बीगु उमेर समूहयापिं सुं नं त्वःमफिइमा धकाः त्वाःत्वालय् वनाः माइकिङ यानाः जानकारी बिइगु याना च्वनागु खँ नं वय्कलं धयादीगु दु । ‘जिमिसं छेँय् छेँय् वनाः खोप अभियानय् सहभागी जुइत इनाप यानाच्वनागु दु । उकिं थ्व पालय् खोप कायेत सुं त्वःफिइमखु धयागु जिमिगु विश्वास दु’ वय्कलं धयादिल । वय्कलं थ्व पालय् महानगरया छगू लाखम्हेसित खोप बीगु लक्ष्य दुगु खँ नं धयादील ।

सम्बन्धित बुखँ

LEAVE YOUR COMMENTS