लःया स्रोत सुचुकुुचु यासें न्यायेकल सिथि नखः

येँ (नेपालभाषा टाइम्स)- सिथि नखः कुन्हु लःया स्रोत सुचुकुचु यायेगु स्वनिगःया पुलांगु हे परम्परा खः । तर तना वनेधुंकूगु थ्व परम्परायात हानं म्वाकेगु लागिं न्हूगु पुस्ता सक्रिय जुया वःगु दु । म्हिगः सिथि नखः कुन्हु स्वनिगःया थीथी थासय् च्वंगु ल्वहंहिति व तुं सुचुकुचु यायेगु ज्या जुल ।

खास यानाः सम्पदा संरक्षणया अभियानय् सक्रिय जुयाच्वंपिं ल्याय्म्ह अभियन्तात जानाः म्हिगः येँया भिंद्यःत्वालय् च्वंगु ल्वहंहित, ओमबहालय् च्वंगु तुं व ल्वहंहिति, इतुम्बहाःया जलनाग च्वनीगु तुं लिसें यल व ख्वपया थीथी थासय् लःया स्रोत सुचुकुचु यायेगु ज्या जूगु खः ।

स्वनिगलय् लःया स्रोत म्हो जुया वनाच्वंगु लिसें त्वनेगु लःया अभाव जुजुं वयाच्वंगु इलय् लःया परम्परागत स्रोतयात हानं जीवित यायेगु लागिं स्थानीय रुपं हे जागरुक जुसें दना वःगु थ्व सांस्कृतिक जागरणयात सकस्यां च्वछाःगु दु ।