थनिंनिसें स्थानीय निकाय चालु

येँ – कर्मचारी समायोजन विधेयक विरुद्ध आन्दोलन यानाच्वंगु स्थानीय निकायया कर्मचारीतय्सं थनिंनिसें ज्या न्ह्याकीगु जूगु दु । कर्मचारी आन्दोलनया कारणं सर्वसाधारण जनता मारय् लाःगु धासें थनिंनिसें ज्या न्ह्याकेगु निर्णय जूगु खँ आन्दोलनया संयोजन यानाच्वंम्ह येँ मनपाया हरिकुमार श्रेष्ठं ‘नेपालभाषा टाइम्स’ यात कनादिल ।

म्हिगः कर्मचारीतय् दथुइ च्वंगु सहलह ज्याझ्वः लिपा थनिंनिसें स्थानीय निकायया ज्या न्ह्याकेगु निर्णय याःगु खः । वय्कलं आः आन्दोलनया रुप हिउगु दुसां हडताल धाःसा जारी जुयाच्वनीगु जानकारी नं बियादिल । थःपिनिगु आन्दोलनया कारणं जनतां दुःख सी मजिउगु खँ कनादिसें वय्कलं आः विधेयकयात कयाः सांसदपिनिगु दथुइ लबिङ यायेगु व सरकारलिसे नं विधेयक संशोधनया निंतिं मेगु कथं दबाब बीगु ज्या धाःसा जुयाच्वनीगु खँ कनादिल ।

वंगु पुस १ गते निसें देय्न्यंकंया स्थानीय निकायया कर्मचारीतय्सं आन्दोलन याना वयाच्वंगु खःसा आन्दोलनया कारणं नक्सा पास, नक्सा दर्ता यायेगु लिसें जनताया थीथी कथंया सिफारिस कायेगु ज्या तकं दिनाच्वंगु खः ।