बागमति–बिष्णुमति खुसिइ मवनेत इनाप

येँ – सरकारं येँया थीथी खुसिइ मवनेत इनाप याःगु दु । मेलम्चीया लः इनेगु निंतिं लायेधुंकूगु पाइप सफा यानाः उकिया फोहोर लः खुसिइ छ्वया हयेत्यंगु जूगुलिं आः स्वनिगःया बागमति, रुद्रमति, बिष्णुमति, मनोहरा लगायतया स्वनिगःया खुसिइ मवनेत काठमाडौं उपत्यका खानेपानी लिमिटेड आयोजना कार्यान्वयन निर्देशनालयं इनाप याःगु खः ।

मेलम्चीया लः वइगु पाइप लायेधुंकाः आः लः इनेगु ज्याय् वये फइगु समस्या समाधान यायेत माःगु तयारी जुयाच्वंगु खँ सीदुगु दु । निर्देशनालयं पाइपयात निर्मलीकरण यायेगु झ्वलय् छ्यलीगु रासायनिक पदार्थं स्वास्थ्यय् बांमलाःगु लिच्वः लाये फइगु जूगुलिं खुसिया लः मछ्यलेत, पशुपंक्षीयात नं खुसीया लः मत्वंकेत व थःपिं नं खुसिइ मवनेत इनाप याःगु खः ।

थौंकन्हय् सुन्दरीजलपाखें नारायणगोपाल चोक तक लानाच्वंगु स्वंगू किलोमिटर पाइपया परीक्षण यायेगु ज्या जुयाच्वंगु दु ।आः वइगु निला लिपा हे मेलम्ची खुसिपाखें न्हिं १७ करोड २८ लाख लिटर लः स्वनिगलय् हयेगु ज्या जुयाच्वंगु खँ आयोजनां धाःगु दु । लः हयेत सुरुङ दयेकेगु ज्या क्वचायेकाः आः ढलानया ज्या जुयाच्वंगु दु ।

थ्वहे झ्वलय् मेलम्चीया सुरुङ ढलान यायेत हःगु सिमेन्ट थीथी पसलय् मियातःगु खँ सीदुुगु दु । मेलम्चीइ ढलान यायेत हःगु ३४० बोरा सिमेन्ट पसलय् मियाच्वंगु इलय् प्रहरीं ज्वंगु खः ।