बाहिरी चक्रपथय् जग्गा लाःपिंत मुआब्जा बी मफइगु

येँ – अर्थ मन्त्रालयं बाहिरी चक्रपथ आयोजनाय् मुआब्जा बी मफइगु स्पष्ट याःगु दु । अर्थ मन्त्रालयं शहरी विकास मन्त्रालययात पौ च्वयाः बाहिरी चक्रपथ आयोजनाय् मुआब्जा बियाः जमिन अधिग्रहण यायेमफइगु स्पष्ट याःगु खः । अर्थ मन्त्रालयया पतिइ ‘बाहिरी चक्रपथ निर्माणया निंतिं माःगु जग्गा मुआब्जा बियाः कायेत व्ययभारया दृष्टिकोणं फये फइगु खने मदु ।

अथे जुयाः ल्यान्डपुलिङ यानाः राइट अप वे यकिन यायेगुपाखे न्ह्यानाच्वंगु प्रक्रियायात पूर्णता बीगु व उगु ज्या पूवनेधुंकाः जक निर्माणया थीथी विकल्पय् सहलह यायेगु उपयुक्त जुइ’ धयातःगु दु । अर्थमन्त्री डा. युवराज खतिवडां मन्त्रिस्तरीय निर्णय धासें आयोजनाया जग्गा अधिग्रहण याये मफइगु स्पष्ट याःगु खः ।

अर्थं मंसिर ५ गते शहरी विकास मन्त्रालययात पौ च्वयाः बाहिरी चक्रपथ बारे थःगु धारणा स्पष्ट याःगु खः । अर्थ मन्त्रालयया पौ लिपा बाहिरी चक्रपथ आयोजनां ल्यान्ड पुलिङपाखें आयोजना न्ह्याकेगु पौ मन्त्रालय बुझे याःगु दु । मन्त्रालयं ७२किलोमिटर ताःहाकःगु बाहिरी चक्रपथया डीपीआर नं आः न्हूगु दयेकगु तयारी यानाच्वंगु दु ।

आयोजनाया एलाइनमेन्ट जःखः च्वंगु आपालं जग्गा चिचीकू यानाः कित्ताकाट यानातःगुलिं न्हूगु डीपीआर दयेकेमाःगु खँ धाःगु दु । आयोजना न्ह्याकेगु निंतिं आः मुक्कं ७२ किलोमिटर जःखः च्वंगु जग्गा रोक्का यानाः न्ह्याकेगु तयारी जुयाच्वंगु खँ धाःगु दु ।