श्रीलंकाय् जेलय् झडप जुयाः खुम्हेसिया ज्यान वन

एजेन्सी – श्रीलंकाया छगू जेलय् कोरोनाया कारणं दंगा जूबलय् म्होतिं नं खुम्हेसिया ज्यान वंगु दु । माहारा कारागारय् कोरोना संक्रमण न्यना वनेवं बन्दीतय्सं धरौटीइ त्वःतेमाःगु व थप सेवा सुविधा बीमाःगु माग यासें प्रदर्शन याःगु खः । थ्व झ्वलय् बन्दीइ व कारागार सुरक्षाय् खटे जुयाच्वपिं सुरक्षाकर्मी दथुइ जूगु झडपय् लानाः खुम्हेसिया ज्यान वंगु खःसा ५२ म्ह मेपिं घाःपाः जूगु खः ।

श्रीलंकाया जेलय् लानाच्वंपिं बन्दीत मध्ये द्वःछिंम्ह मल्याक बन्दीतय्त संक्रमण पुष्टि जुइधुंकूगु दु । श्रीलंकाया थीथी सञ्चारमाध्यमतय् कथं दंगा न्यनेवं सुरक्षाकर्मीतय्सं गोली कयेकूगु खः । स्थानीयवासीतय्सं संचारकर्मीतय्त कारगार दुने तःधंगु मि च्याःगु खनेदुगु खँ नं धाःगु दु । प्रहरी प्रवक्ता अजित रोहनां जेल दुने हुलदंगा जूगु नियन्त्रण यायेत प्रहरीं बल प्रयोग याःगु खँ धाःगु दु । वय्कलं घाःपाः जूपिंत स्थानीय अस्पतालय् भर्ना यानागु खँ नं कनादीगु दु ।  अथेहे जेलया सुरक्षाया निंतिं विशेष तालिमप्राप्त न्यागू कमान्डो टोली परिचालन यानागु खँ नं वय्कलं धयादीगु दु ।

अथेहे राजधानी कोलम्बोय् च्वंगु वेलिकाडा जेलया कैदीतय्सं नं जेलया पलिइ गयाः थःपिंत धरौतीइ त्वःतेमाः धकाः नारा थ्वयेकूगु दुसा आगुनाकोलापालास्सा जेलय् नं च्यान्हु न्ह्यवनिसें प्रदर्शन जुयाच्वंगु दु। उमिसं थःपिंत तयातःगु जेल स्वास्थ्य मापदण्ड कथं मदुगु खँ धयाच्वंगु दु । मानवअधिकारवादीतय् कथं श्रीलंकाय् झिद्वः क्षमताया जेलय् २६ हजार तक कैदी तयातःगु दु ।

सम्बन्धित बुखँ

LEAVE YOUR COMMENTS