येँ महानगर विधेयक – टिकट मकासे बस गःसा कारवाही

येँ – येँ महानगरपालिका क्षेत्र दुने आः टिकट मकासे बस गइपिं यात्रुतय्त नं कारवाही याइगु जूगु दु । येँ मनपाया म्हिगः क्वचाःगु नगर सभाया प्यक्वःगु अधिवेशनं पारित याःगु ‘सवारी तथा यातायात व्यवस्थापन ऐन, २०७५’ स थ्व व्यवस्था यानातःगु दु ।
सार्वजनिक यातायात मर्यादित यासें सर्वसाधारणयात उकी पहुँच दयेके बीगु ताः तयाः मनपां उगु ऐन पारित हःगु खः।
ऐनय् व्यवस्था यानातः कथं टिकट मकासे सार्वजनिक बस गइम्ह यात्रुयात न्हापां नसिहत बीगु वा १०० तका जरिवाना यायेगु व लिपा हानं अज्याःगु ज्या यात धाःसा ५०० तका जरिवाना यायेगु व्यवस्था दु । यदि जबर्जस्ती यात धाःसा बसं क्वकयाः प्रहरीयात जिम्मा बीगु तकया व्यवस्था उकी यानातःगु दु ।
लिसें बस गयेबलय् आः अय्लाः थ्वँ त्वने मजिउगु, अश्लील खँ न्ववाये मजिउगु खँ नं दुथ्याकातःगु दु । अथे हे चालक व सहचालकं नं लाथेपाथे थासय् गाडी दिके मजिउगु, यात्रुयात दुव्र्यवहार याये मजिउगु, अश्लील खँ न्ववाये मजिउगु आदि व्यवस्था यानातःगु दु ।

येँ मनपाया नगरसभा म्हिगः मेयर विद्यासुन्दर शाक्यया अध्यक्षताय् प्यंगू थीथी विधेयक पारित यासें क्वचाःगु खः । लिसें थीथी वडाया वडा सदस्यतय्सं वडा दुने ज्या यायेबलय् थःपिंत नं अधिकार बीमाः धइगु माग यासें तःगु प्रस्तावयात कयाः २३ वडाया वडा अध्यक्ष मचाराजा महर्जनया अध्यक्षताय् छगू कार्यदल गठन यायेगु निर्णय नं जुल । नगरसभा लिपा जूगु पत्रकार सम्मेलनय् प्रवक्ता इश्वरमान डंगोल, सूचना अधिकृत बसन्त आचार्य व वित्त प्रमुख बुद्ध मानन्धरतय्सं खँ कनादीगु खः ।