लुँया भाः अझ हे थहां वन

येँ – लुँया भाः हानं थहां वनाः हाकनं उच्चतम भाःया रेकर्ड कायम याःगु दु । म्हिगः लुँ प्रतितोलां झिंन्यासः तका थहां वनाः ७१,५०० तका थ्यंगु दु । वंगु साउन २८ गते प्रति तोला लुँ ७१,००० तका थ्यंगु खःसा म्हीग प्रतितोलां ७०० तका कुहां वःगु खः तर भाः म्हिगः हाकनं थहां वंगु खः ।

म्हीग छक्वलं लुँ प्रतितोला ७०० तका कुहां वःगुया मू कारण अमेरिकां चीनपाखें आयात जूगु ३०० अर्ब डलरया सामानय् वइगु सेप्टेम्बरंनिसें अप्वयेके धाःगु भन्सार दरयात स्वला तका लिछ्याःगुलिं खः । तर उकियात लगानीकर्तां विश्वास याये मफयेवं हाकनं भाः थहां वंगु खँ लुँवहः व्यवसायी महासंघया पुलांम्ह अध्यक्ष तेजरत्न शाक्यं ‘नेपालभाषा टाइम्स’ यात कनादीगु दु ।

अथे हे वहः नं २० तकां थहां वनाः ८४० तका थ्यंगु दु । लुँया भाः थहां वनेगु क्रम निरन्तर जारी जुयाच्वंगुलिं यानाः येँया बजारय् लुँ न्याइपिं तसकं म्हो जूगु खँ नं पुलांम्ह अध्यक्ष शाक्य कनादिल । वय्कलं थौंकन्हय् बजारय् लुँ न्याइपिं शून्य हे जुयाच्वंगु धासें सप्लाई अप्वः जुयाच्वंगु व डिमाण्ड मदुगुलिं पसः च्यायेकेत तकं थाकुयाच्वंगु खँ कनादिल ।

गनं गनं लुँवहः पसलं धाःसा तोलां ७० हजार तका थ्यनाच्वंगु लुँ हथाय्पिंत ६५ हजार तकां बिउसा न्याना बीगु यानाच्वंगु दु । शाक्यया कथं म्हीग अन्तर्राष्ट्रिय बजारय् लुँ प्रतिऔंश १५०० डलरं कारोबार जूगु खःसा म्हिगः छक्वलं २२ डलर थहां वंगु खः । अथे हे म्हिगः डलर नं ३० ध्यबा थहां वंगु खः । उकिया लिच्वः नं लुँया बजारय् लाःगु खः ।

सम्बन्धित बुखँ

LEAVE YOUR COMMENTS