राष्ट्रिय ज्ञानमाला समितिइ न्हूधाः
येँ(नेपालभाषा टाइम्स)÷ नेपाल राष्ट्रिय ज्ञानमाला समितिया झिक्वःगु राष्ट्रिय ज्ञानमाला सम्मेलनं न्हूगु ज्यासना पुचः ल्यःगु दु । वंगु पुस २३ निसें २५ तक स्वन्हुयंकं भ्वतय् जूगु सम्मेलनं समितिया न्हूगु ज्यासना पुचः ल्यःगु खः ।
न्हूगु ज्यासना पुचलय् रमना श्रेष्ठयात हे नायः ल्यःगु दुसा वरिष्ठ न्वकु पदय् विमलबहादुर श्रेष्ठयात मनोनित याःगु दु । मेपिं प्यम्ह न्वकु पदय पुण्यरत्न शाक्य (माध्यमाञ्चल), चन्द्र हलुवाइ (पूर्वाञ्चल), केशवलाल वज्राचार्य (पश्चिमाञ्चल), धनबहादुर महर्जन (स्वनिगः), मूछ्याञ्जेय् इन्द्रमुनि शाक्य, लिउ मूछ्याञ्जेय् तिर्थरत्न शाक्य, दांभरिंलय् राजभाई शाक्य, लिउ दांभरिंलय् ईश्वर वज्राचार्ययात ल्यःगु दु ।
अथे हे दुजलय् भीमवज्र वज्राचार्य, फुलबहादुर महर्जन गणेशराम प्रजापति, माणिकरत्न शाक्य, रामगोपाल श्रेष्ठ, तेजप्रसाद मानन्धर, सकेन्द्र ताम्राकार (मनोनित), पद्मा नकर्मी (मनोनित), अनुजा बज्राचार्य (मनोनित) च्वनादीगु दु ।
वांख्यः ज्ञानमाला भजन समितिया व्यवस्थापनय् जूगु सम्मेलनय् भिक्षु कोण्डन्य महास्थविरं ‘बुद्धया उपदेश अनुशरण याये, चित्तयात झीसं परिशुद्ध याये’ विषयय् ज्यापौ न्ह्यब्वयादीगु खःसा बौद्ध विद्वान उपप्राध्यापक पुष्परत्न शाक्यं टिप्पणी यानादीगु खः ।
अखिल नेपाल भिक्षु महासंघया अध्यक्ष श्रद्धेय भिक्षु फ्राखु्र विशाल धम्मशोभन महास्थविरं उलेज्या यानाबिज्याःगु सम्मेलनय् भिक्षुगण, काभे्र २ नं क्षेत्रया सांसद गोकुल बास्कोटा, २ नं क्षेत्रया बागमति प्रदेशसभा सदस्य कञ्चनचन्द्र वादे श्रेष्ठ, भ्वत नगरपालिकाया प्रमुख शान्तिरत्न शाक्य, उपप्रमुख विमला सापकोटा लगायतं नुगःखँ तयादीगु खः ।
देय्न्यंकंया ८५ गू ज्ञानमाला भजन खलकं ब्वति काःगु सम्मेलनय् ७५ गू ज्ञानमाला भजन खलःपाखें भजन न्ह्यब्वःगु खः ।
LEAVE YOUR COMMENTS