महानगरया फुटपाथ पसः चिइकेगु अभियान

येँ – येँ महानगरपालिकां फुटपाथय् तयातःगु पसः चिइकेगु सुरु याःगु दु । लँजुवाःत वने हे मछिंक तयातःगु थःगु पसः आः महानगरन्यंकं फुक्क थासं चिइकेगु खँ धाःगु दु । महानगरपालिकां दकलय् न्हापां रत्नपार्कं थज्याःगु पसः चिइकेगु सुरु याःगु खःसा छुं न्हि लिपा हे महानगरन्यंकंया फुटपाथ पसः चिइकेगु खँ धाःगु दु ।

अव्यवस्थित रुपं न्ह्याथासं तयातइगु थज्याःगु पसलं लँजुवाःतय्त जक मछिंका बिइगु मखुकि दुर्घटनाया कारण नं जुयाच्वंगु दु ।सतक सिथय् फुटपाथय् पसः तल धाःसा नगर प्रहरीं ज्वनि । इलय् ब्यलय् नगर प्रहरी वयाः फुटपाथ पसः चिइकेगु यानाच्वंगु खःसां आः अभियान कथं हे न्ह्याकेगु खँ धाःगु दु ।

थ्वयां न्ह्यः नगरप्रहरीं न्हिनय् जक ज्वंवइगु व सनिलय् जुलकि वास्ता मयायेगु यानाच्वंगु खः । नगरप्रहरीं ज्वना हइगु पसःया सामान छुं ध्यबा जरिवाना पुइकाः लित बीगु यानाच्वंगु खः । आवंलिं महानगरपालिकां फुटपाथय् पसः तयातःगु सामान ज्वना हल धाःसा लितमबिसे लिलाम यानाः मियाछ्वयेगु तयारी नं यानाच्वंगु दु ।