‘ख्वपको पहिचान’ नेपालभाषां ब्वंकेत ज्ञापन पौ
ख्वप(नेपालभाषा टाइम्स)÷नेवाः देय् दबू ख्वप नगर कमिटीं ख्वप नगरपालिकां लागू यानातःगु स्थानीय पाठ्यक्रम अन्तर्गत ‘ख्वपको पहिचान’ नेपालभाषाया माध्यमं ब्वंकेगु व्यवस्था यायेत धासें ज्ञापन पौ लःल्हाःगु दु । अन्तर्राष्ट्रिय मातृभाषा दिवसया दिं लाकाः देय् दबू ख्वप नगर समितिं उगु ज्ञापन पौ लःल्हाःगु खः ।
ज्ञापन पौ लःल्हाये न्ह्यः अन्तर्राष्ट्रिय मातृभाषा दिवसया लसताय् सुर्यमधि त्वालं छगू जुलुससहित नगर परिक्रमा याःगु खः । नगर परिक्रमा लिपा ख्वप नगरपालिकाया उपप्रमुख रजनी जोशीयात देय् दबू ख्वप नगर समितिया नायः कृष्णप्रसाद प्रजापतिया नेतृत्वय् वंगु पुचलं ज्ञापन पौ लःल्हाःगु खः । नेवाः देय् दबू ख्वप जिल्ला समिति, ख्वप नगर समिति, नेवाः मिसा दबू ख्वप जिल्ला समिति व ख्वप नगर समितिपाखें मंकाःकथं स्थानीय पाठ्यक्रम नेपालभाषां हे अध्ययन, अध्यापन यायेगु व्यवस्था यायेत माग यासें ज्ञापन पौ लःल्हाःगु खः ।
ख्वप नगरपालिकां लागू यानातःगु स्थानीय पाठ्यक्रम ‘ख्वपको पहिचान’ खय् भासं जक मखसे नेपालभाषाया माध्यमं नं पाठ्यक्रम तयार यानाः फत्तले वइगु शैक्षिक सत्रनिसें हे ब्वंकेगु व्यवस्था यायेत व ख्वपया त्वाः, बहाः बहीलिसें मेमेगु थाय्या नां मौलिक स्थानीय नेवाः भासं हे तयेत नं ज्ञापन पती धयातःगु दु ।
नगरपालिकां आः लागू यानातःगु सफुतिइ भ्वय् घासा, थाय्बाय्, नसात्वँसा, नखःचखः, रीति, परम्पराया नां जक नेवाः भासं तयातःगु व अध्यापन धाःसा खय् भासं याका वयाच्वंगुलिं उकियात कयाः थःपिंसं ज्ञापन पौ बियागु देय् दबू ख्वप नगर समितिया नायः प्रजापतिं ‘नेपालभाषा टाइम्स’यात कनादिल । नगरपालिकाया सफुतिइ यःमरि पुन्हि, गुंपुन्हि, ल्वहंचामरि, गुंला बाजं, बुरांज्या, कसिमलापाँय्, तचामाकु पाठ्यसामग्रीया नां जक नेवाः भासं तयातःगु तर, ब्वंकेगु धाःसा खय् भासं जुयाच्वंगुलिइ वइगु शैक्षिक सत्रनिसें हे नेपालभाषाया माध्यमं ब्वंकेगु व्यवस्था यायेत ध्यानाकर्षण यासे ज्ञापन पौ लःल्हानागु वय्कलं कनादिल ।
ज्ञापन पौ लःल्हाना कासे उपप्रमुख जोशीं याकनं हे मुँज्या च्वनाः थ्व थुकियात कार्यान्वयनय् हयेगु प्रतिवद्धता प्वंकादीगु वय्कलं जानकारी बियादीगु दु । नगर प्रमुख जोशी विकास निर्माण व पूर्वाधारया योजना कार्यान्वयन यायेगुपाखे जुयाच्वनेमाःगुलिं थुखेपाखे ध्यान बी मफुगु व पूर्व तयारीया अभावया कारणं नेपालभाषां पाठ्य सामग्री तयार यायेत ई मदुगु स्वीकार यासें थःपिंनि पक्षपातपूर्ण ज्या यायेगु सोच मदुगु खँ धयादीगु खः ।
अथे हे स्थानीय थाय्बाय्या नां मौलिक नेपालभाषां तयेगु खँय् नेवाः नां लुइकाः नगरपालिकाय् जानकारी बिल धाःसा उकी रञ्जना लिपि हे छ्यलेत थःपिंत छुं आपत्ति मदुगु खँ कनादीगु खः ।
सुर्यमधिं जुलुस न्ह्याके न्ह्यः ज्ञापन पौ नगर समितिया नायः प्रजापतिं ब्वनाः न्यंकादीगु खःसा ख्वप जिल्लाया नायः नरेश नेवालं नं संबोधन यानादीगु खः ।
LEAVE YOUR COMMENTS